UKRAINE: Putin yeeweredde okulumba South Korea lwa kweyingiza mu lutalo

PULEZIDENTI wa Russia, Vladimir Putin alabudde South Korea nti, tegeza okweyingiza mu Ukraine ng’ewaayo ebyokulwanyisa kuba tejja kwagala binaddirira.
Kino kyaddiridde South Korea okulangirira nti, singa muliraanwa waayo North Korea tasazaamu ndagaano ze yakoze ne Russia, luno Putin lwe yagenzeeyo, nabo baabadde baakwesala akajegere, bapokere Ukraine eby’okulwanyisa ekube Russia awaluma.
Bino olwagudde mu matu ga Putin eyabadde tasalikako musale, n’awanda omuliro nti, South Korea kye baayogedde basaanye ‘bakimire’ n’okukyerabira bakyerabire kubanga Russia k’egeza n’ekimanyaako ejja kubakuba basaanewo, ensi yaabwe esigale mu byafaayo nti, yaliwo ko!
Putin okwogera bino yabadde mu lukuhhaana lwa bannamawulire ku bugenyi bwe yabaddeko e Vietnum ne yeewera nti, singa South Korea ebaako ky’ekola ku North Korea oba okupanga olukwe okuwa Ukraine eby’okulwanyisa, Russia ya kubakolako ekirooto eky’entiisa ekinaagugumula ensi yonna balyoke bategeere nti, teyeemoolerwako.
South Korea (omunywanyi ennyo ne Amerika) abadde awa Ukriane ebintu ng’ebikozesebwa okwetuusaako obujjanjabi obusookerwako, eddagala, obuuma obubalabula ku bbomu ez’omu ttaka n’ebyambalo ebibaziyiza okukubwa ennyo eby’okulwanyisa naye babadde tebaweerezangayo byakulwanyisa ng’eky’endagaano ya Russia ne North Korea kye kyabasuddemu akalogojjo, Putin k’alabudde okubavumula.
Kyokka wadde guli gutyo, Amerika ezze erumiriza North Korea nti, ezze eweereza Russia ebyokulwanyisa eby’amaanyi by’ekozesa mu lutalo lw’e Ukraine newankubadde Putin akyegaana