Omwoleso gw'ebyobulambuzi mu Buganda gutongozeddwa

OMUKUBIRIZA w’Olukiiko lwa Buganda olukulu, Patrick Mugumbule asabye bonna abali ku mulimu gw’okutumbula obulambuzi okusabika n’okutunda obulungi eby’obulambuzi byaffe abantu basobole okusikirizibwa amangu okujja ku birambula.

Mugumbule agamba nti obulambuzi busaanye okusabikibwa mu ngeri ennungi bisobole okwetanira abantu, olwo bisobole okukulakulana okutuuka ku ddaala ly’ensi yonna,biveemu ensimbi.

Bino abyogeredde Bulange-Mmengo ku mukolo kwatongoleza omwoleso gwa Buganda ogw’ebyobulambuzi ogutuumiddwa Omwoleso Gaggadde nga guno gwakubumbujjira wakati wa August 16 okutuuka August 25,2024 mu Lubiri e Mmengo mu Kampala.

Okutongoza olwoleso

"Olina okuteekamu ekirungo ku ky'obulambuzi kyolina. Eby'obulambuzi byetaaga okusibibwa obulungi nti omuntu asobola okusikkirizibwa mangu okubyetanira," Omukubiriza Mugumbule bweyagambye.

Minisita w’amawulire n’okukunga abantu mu Buganda, Israel Kazibwe, nga y’akikkiridde Minisita w’ebyobuwangwa n’obulambuzi Dr.Anthony Wamala, ategezezza ng’ekitundu ku nsimbi ezinaava mu mwoleso guno zigenda kweyambisibwa okuddukirira ku bantu b’e Karamoja.

Ye Albert Kasozi nga y’akulira emirimu kitongole ekiddukkanya eby’obulambuzi mu Buganda agambye nti omwoleso guno gugenda kubumbujjira wansi w’omulamwa ogugamba nti ‘Okutumbula eby’obulambuzi n’obulimi’ n’ekigendererwa ky’okuteekawo enkulakulana okuyitira mu by’obulambuzi n’obulimi.

Omwoleso guno gutegekeddwa aba Luba Events ekulirwa Moses Lubuulwa ng’ategeezezza nti bataddemu ebintu ebiwerako okuli empologoma etambula, obugaali,ensambaggere n’ebyobulambuzi bingi mu Buganda ne Uganda.

Aboolesi abakulu kugenda kubeerako aba Sadolin Paints, Farm Centre e Kibuye,Link communications, aba Buganda Heritage & Tourism Board, amasaza,ebika n’ebitongole ebirala