Aba Mpuuga beevumye ekyabaleesezza Alien Skin ku mukolo

ABAWAGIZI ba kaminsona wa Palamenti Mathias Mpuuga, baasigadde batolotooma olw’omuyimbi Patrick Mulwana amanyiddwa nga Alien Skin gwe baaleese okubawa
vayibu nga batongoza ekisinde ekipya ekya Democratic Alliance, ate okukkakkana nga
vayibu agiyiyeemu amazzi. Alien olwatuuse ku mukolo ogwabadde ku Malibu Gardens
ewa Bakuli, baamwanirizza mu mizira era Mpuuga eyabadde ayogera yasoose n’ayimiriramu, omukulu Alien asooke atuule.
Mu kwogera kwe, Mpuuga yalaze nti yenyumiriza nnyo mu Alien, kuba alina abavubuka
bazze nabo mu kisinde kya Democratic Alliance, abaagala enkyukakyuka enteeketeeke
obulungi, nga bakulemberwa abantu abateeketeeke nga Mpuuga. Kyokka Alien olwakutte akazindaalo, yayagadde abeeko kyayogera eri abantu, naye gye byaggweeredde ng’ayokezza ng’enjogera y’ennaku zino bweri. Ku mukolo gwonna,
aboogezi beewaze okwogera ku ssente obukadde 500 ezaaleetera Mpuuga akabasa, ne
zimwawula n’abakulu mu kibiina kye ekya NUP. Naye ye Alien olwakutte akazindaalo, yagambye nti; “Nze bansiba lwa kubba kasimu, naye ne mukulu wange yabbayo ebitaano, mbu, si bwe kiri? Kati ‘birds of the same feathers’, ow’akasimu n’owekido…kitegeeza kwatagana ne siteegi enneneko, bwoba obba obbire ku mutendera ogwa waggulu….”
Ebigambo ebyo byannyogozza abaabadde ku mukolo, era bye byafuuse entikko ya buli kimu ku mukolo, okwetoloola emikutu gyonna emigatta bantu. Wabula omutegesi
w’omukolo guno Michael Mabikke, yagambye nti ebigambo bya Alien abantu
baabifunye bubi, kuba yabadde ategeeza nti abantu bangi be basibira obwereere, nga ye
gwe baasiba olw’okubba essimu nga bamuwaayiriza ne Mpuuga naye baamuwaayiriza okubba obukadde 500.