Abatujju basumagizza America ne batta 15

BANNANSI ba America omwaka bagutandikidde mu kusattira, abatujju b'akabinja ka Islamic State (ISIS) bwe basumagizza abeebyokwerinda ne bakola obulumbaganyi bwa mirundi ebiri ku Lusooka Omwaka, okukkakkana nga basse abantu 15 n’abasukka mu 20 ne bafuna ebisago.
Obulumbaganyi buno obwabaddewo mu ssaawa eziddiring’ana, bwatandikidde mu kibuga New Orleans mu ssaza ly’e Louisiana, 'Kaddugala' Shamsud Din Jabbar 42, omutuuze wa Americ era eyaliko mu magye gaayo, bwe yeesuddeemu akambaayaaya n’asaabala abantu mwe yattidde 15 n’abalala n’abagoyaagoya.
Wadde poliisi yagezezzaako okuyimiriza omusajja ono ng'ekuba emipiira gya mmotoka ye amasasi, kaabadde kaseera kazibu okumufunza. Bwe yalabye abeebyokwerinda bamwetoolodde n'agifuluma nga bw'akaalakaala n'emmundu olwo poliisi n’emukuba
amasasi agaamuttiddewo.
Ekyaggye Abamerica enviiri ku mutwe kye kitongole kya America ekikessi ekya FBI okulangirira nti bwe kyekebezze mmotoka Jabbar mwe yabadde, kyasanzeemu bendera ey’abakambwe ba Islamic State (ISIS) era ne kirangirira nti aba ISIS be baabadde emabega w’obulumbaganyi buno ng’ono baamukozesezza bukozesa okutuukiriza
ebigendererwa byabwe.
Pulezidenti wa America, Joe Biden yagambye nti wadde ono abadde mutuuze waabwe, abatujju abalina ekiruyi ku America be baamukozesezza ensobi n'alabula nti bonna abaabadde mu lukwe luno mu America n'ebweru waayo baakukolwako.
OMUTUJJU OMULALA YEETULISIZZA MU MMOTOKA KU WOOTEERI YA TRUMP
Abamerica baabadde bakyali ku ttemu ly’e New Orleans, mu ddakiika ntono ne wabaawo okubwatuka ku wooteeri ya Pulezidenti wa America omulonde, Donald Trump esangibwa mu kibuga Las Vegas.
Mmotoka eyabwatuse n'ebikkukako akasolya n'okutuntumuka omuliro yabadde ya kika kya Cybertruck ekolebwa kkampuni y’omugagga Elon Musk, munywanyi wa Trump ennyo, ng'eno kigambibwa nti omutujju yagipangisizza mu ssaza ly’e Colorado
okutuuka e Las Vegas n'agisimba mu luggya lwa Trump International Hotel okumpi n'omulyango omunene olwo n'ebaluka nga wayise eddakiika nga 30 era eyagibaddemu tannategeerekeka kuba yasiridde.
Mu kunoonyereza okusookerwako, FBI yalaze bye baasanze mu mmotoka eno oluvannyuma lw’okugizikiza okwabadde emikebe gy’ebiriroliro (fireworks), emikebe gya ggaasi afumba n’ebidomola by’amafuta ssaako ebintu ebirala ebyalabise okubeera bbomu enkolerere nga byabadde tebinnabaluka we baagizikirizza.
Abeebyokwerinda era baakizudde nti mmotoka zombi ezaakozeseddwa mu bulumbaganyi zaapangisiddwa okuva ku kkampuni y'emu eya Turo ekyongera okulaga nti waabaddewo akakwate mu bulumbaganyi bwombi