Mmengo erabudde eyeeyita Kabaka w’emisambwa

MMENGO esabye abantu obutawugulwa bantu bazannyira ku Nnamulondo n'okutyoboola ekitiibwa kyayo.
Okusaba kuno kwakoleddwa minisita w'amawulire, okukunga era omwogezi w'Obwakabaka, Israel Kazibwe eyabadde ayogera eri bannamawulire ku Bulange
e Mmengo. Yabadde alabula obutagendera ku bikolwa by'omusajja eyalabiddwako
ng'akolebwako emikolo nti okuba Kabaka w'emisambwa.
Omusajja ono, Moses Kafunende yakoleddwaako emikolo egyefanaanyiriza egikolebwa ku Kabaka ku kyalo Nakateete e Buddu ku nkomerero ya wiiki ewedde.
Minisita Kazibwe asabye abantu ekikula kino obutabeesembereza.
"Ntegeeza Obuganda nti bino ebikolwa eby'engeri eno tebyekusa ku nnono yonna
mu Bwakabaka bwa Buganda era si bituufu," Kazibwe bwe yagambye. Yavumiridde
n’omusamize eyeeyita Ssaabakabona Jjumba Aligaweesa eyalabiddwa ng'akola emikolo
ku Kafunende n'amulabula obutaddamu kuba Buganda erina Kabaka omu.
Bwe yabuuziddwa ku kya Kafunende okubeera n'abaserikale, Kazibwe yagambye
nti ebyo bikolebwa abantu abatayagaliza Bwakabaka
birungi.
Kazibwe yabuulidde Bukedde nti balinze abakulira amagye okunnyonnyola, abaamagye
kye baabadde bakola ku mukolo guno n'agamba nti kyandibadde kirungi amagye
okwebuuzanga ku Bwakabaka nga tebannagenda mu bintu nga bino. Minisita Kazibwe
yeebazizza Ssababiito w'e Kibulala, Samuel Walugembe Kateregga atwala Kafunende okuvaayo ku bikolwa bino.