Abakungu ba Gavumenti batenderezza omugenzi Brig.Gen. Charles Oluka

MINISITA w'obutebenkevu mu ggwanga, Maj.Gen. Jim Muhwezi atenderezza abadde akulira ekitongole ekikettera munda mu ggwanga ekya ISO, olw'okumalawo endooliito ezaali zifuuse baana baliwo.
Muhwezi era nga ye yakiikiridde omumyuuka wa Pulezidenti mu mmisa eyayimbiddwa ku Eklezia ya St. Padre Pio e sangibwa e Kabulamuliro, e Bwebajja mu Wakiso, yategeezezza nti omugenzi Brig.Gen. Charles Oluka ekiseera lweyaweebwa ekifo ky'akukulira ISO, entalo zaali nnyingi mu kitongole, kyokka ebbanga ly'abaddewo, entalo zonna zaggwaawo.

Omulambo gwa Brig. Gen, Charles Oluka

Kino akitadde ku bukugu bw'ababadde nabwo mu nkolaye ey'emirimu.
Yagambye nti, omugenzi abadde muyivu era nga yali akola ku ttendekero ly'abavuzi b'ennyonyi e Soroti.
Wadde nga yasanze akaseera akazibu okubaako ky'ayogera ku bba olw'obuyinike mwe yabadde, Nnamwandu w'omugenzi Harriet Oluka, yeebazizza Pulezidenti Yoweri Museveni, olw'obwesige bwe yassa mu bba n'aweereza eggwanga lye okutuusa Katonda lweyamujjuludde.
Ku lw'abaana b'omugenzi, Lt. Vivian Okullo, yasabye gavumenti ereme kubalekerera wadde nga kitaabwe avudde mu bulamu bw'ensi eno.
Mungeri eyeewuunyisizza abakungubazi, Akullo, yasomye bannamwandu ba kitaawe be yalese omwabadde; Rose Oluka, Christine Wataka, Susan Malinga, ne Harriet Oluka, era n'abasaba beewale enjawukana batwale mu maaso emirimu n'okukuuma omukululo kitaawe gw'alese.
Ono era yategeezezza nti kitaawe alese abaana 13, kyokka nga waliwo n'abalala baakuzizza neyeeyama okubakwatako basigale nga bali bumu.
Bannyina ba Oluka, abasiisiita okuli; Sarafiina Amuleng ne Florence Anaso, ategeezezza nti mwannyinaabwe abadde ayagala nnyo Eklezia ate ng'alina emikwano nga buli kiseera abeera musanyufu nga kizibu okumanya bw'aba ng'anyiize.

Aba Famire y'omugenzi

Mukulu w'omugenzi Ogera Ochabal, ye yayogedde ku lw'abazadde baabwe okuli Martin Emuku ne mukyalawe, era n'ategeeza nti bombi enkuyege zikyabakubira enduulu. Yeebazizza ekitongole kya ISO ne Pulezidenti Museveni, olw'okukkiriza okuziika muganda waabwe mu bitiibwa ebijjuvu.
Omugenzi agenda kuziikibwa ku Lwomukaaga lwa wiiki eno mu disitulikiti y'e Kalaki, ku biggya bya bajjajjaabe