Omuliro ogwokya emmaali y’abasuubuzi ku Bbiri gwongedde okubatabula

OMULIRO ogwokya emmaali y’abasuubuzi b’oku Bbiri gwongedde okubatabula ne
basonga ku mugagga ayagala okutwala ekifo kino nti, yandiba nga y’ali emabega
waagwo.
Mu bbanga lya myezi ena, omuliro gwa mirundi esatu gwe gwakabookya, emmaali
y’abasuubuzi n’etokomoka.
Ogwakutte eggulo ku Lwokusatu gwasaanyizzaawo ebyuma ebyabaweebwa Pulezidenti Museveni okwekulaakulanya. Gwatandise ku ssaawa 7:00 ez’ekiro ne gukwata ebibanda
mwe babajjira entebe, ssaako amaduuka agatunda sipongi akozesebwa mu ntebe, embaawo, ebizimbisibwa, obuduuka obutunda eby’okunywa n’okulya era tewali kyataasiddwa.

Kansala w’omuluka gwa Makerere I awaagudde enjega eno, Godfrey Katwere yagambye nti, mu December w’omwaka oguwedde omuliro gwakwata, ate omulala gwaliwo mu January w’omwaka guno, wabula n’okutuusa kati poliisi teraganga lipooti ku kyavaako buzibu.

Ssentebe w’ababazzi Godfrey Kizito, yategeezezza nti, kirabika waliwom ow’ettima eyakumye omuliro guno n’agattako nti, ebyuma 11 ebibalirirwamu obukadde 200 buli kimu ebyabaweebwa Pulezidenti Museveni mu 2017 byonna byayidde.

Akulira poliisi y’oku Kaleerwe, Rogers Musana yagambye nti, mmotoka za poliisi ezizikiriza omuliro zaayanguyeko era abatuuze baakoledde wamu ne poliisi mu kuguzikiza.