Ab'Engabi baagala kukola bbanka ya kika

BAZZUKULU ba Nsamba abeddira Engabi bategeka okutandikawo bbanka y’Ekika kyabwe basinziire omwo okwekulaakulanya n’okugonjoola ebisoomoozo mu Kika kyabwe.

Bino byayogeddwa avunaanyizibwa ku by’amawulire mu kika kino, Peter Muyomba Tegeebikkwa bwe baabadde ku butaka bw’Ekika e Buwanda mu Mawokota ng’abakulembeze b’e Ngabi beeyanza Omutaka Nsamba olw’okubalonda ku bukulembeze.

Nsamba (ku Ddyo) Akulira Ekika Ky'engabi.

Mu beeyanzizza mwabaddemu Bakatikkiro ababiri; Yiga Balonde ne Everisto Sseguya, olukiiko olutambuza egy’ekika, Abataka b’Amasiga, ab’Emituba, ab’Ennyiriri ne Bannamateeka b’Ekika abakulemberwa Lubega Sseggona ne Everisto Mugagga.

Bwe yabadde ayogera eri bazzukulu be, Omutaka Aloysius Nsamba Magandaazi II yabakuutidde obutasuulirira buwangwa bwabwe, kubanga abaabutandika baalina ebirungi ebikusike omuntu ow’ebiro bino byatayinza kulengera mangu.

Yabakuutidde okuba obumu bayambagane mu bintu eby’enjawulo omuli okuweerera abaana, ate bajjumbire emirimu omuva ssente olwo bagaggawale bakamale.

Avunaanyizibwa ku by’emizannyo Lawrence Muwonge yasuubizza Abazirangabi nga olukiiko lwe olw’emizannyo bwe lukola obutaweera okuddamu okuwangula empaka z’omupiira gw’Ebika bya Buganda nga bwe gwali omwaka oguwedde.

Baasonze obukadde bw’ensimbi 24 zigende ku nkulaakulana y’Obutaka bw’Ekika e Buwanda ne baatonera Omutaka Nsamba entebe, ekibumbe ky’Engabi ekyavudde e Bugerere ew’omutaka Sseguya eyawezezza egy’obukulu 102, n’eng'oma gye baayise Lukonge nti, yeekubwa Nsamba bw’aba aggulawo emikolo gy’Ekika ky’Engabi mu butongole.