Ababbooda basse omubbi w'emmundu akubye bannaabwe amasasi

Omuntu omu agambibwa okuba omubbi ow'emmundu attiddwa aba bodaboda mu bukambwe, oluvannyuma lw'okukuba bannaabwe abalala babiri amasasi agabalumizza.

Obulumbaganyi buno bubadde Lweza Cell A, e Ndejje mu munisipaali ya Makindye Saabagabo e Wakiso, ababbi ababadde n'emmundu babiri nga batambulira ku pikipiki nnamba UCG 774 A, bwe bayasizza endabirwamu y'emmotoka premeo nnamba UBE 079Z ebadde esimbiddwa wabweru wa N and N a unisex Saloon ne babbamu ensawo bbiri ne babulawo.

Mu kugezaako okudduka, aba bbooda okubadde Peter Tumwesigye 27 ne Abdul Swabur 18, bagezezzaako okubawondera kyokka ne babakubamu amasasi agabalumizza ne batwalibwa mu ddwaaliro lya Mildmay.

Kigambibwa nti tekirobedde ba bbooda balala kubagoba nga bali wamu ne poliisi, era omu ku babbi ne bamukuba ne bamutta emmundu ne bagizuula.

Ebirala ebizuuliddwa, kuliko pikipiki ekozeseddwa mu bubbi, endagamuntu ey’omu ku babbi, amasimu abiri n'ebirala era ng'omuyiggo gw'omulala, gukolebwa okusinziira ku amyuka omwogezi wa poliisi mu Kampala, Luke Oweyesigyire.