'Abavubuka mweyambise yintaneeti n'amasimu gammwe okwegobako obwavu'

ABAVUBUKA bakoowoddwa okujjumbira tekinologiya n’amasimu ge bakozesa okugufuula omukisa ogw’okukoleramu ssente nga bettanira ebyo ebintu ebyetaagibwa mu katale ng’emmere kw'ossa n’ebirime ebyenjawulo.

Raban Joshua Musinguzi omutandiiisi wa Agro- Business mu ggwanga yategeezezza nti kyabulabe mu ggwanga okubeera nga mulimu ebbula ly’emirimu ng’ate abavubuka bakozesa amasimu ne yintaneeti, n'agamba nti guno basobola okugufuula omukisa ogw’okwenogera ssente.

Musinguzi agamba abavubuka basobola okukozesa amasimu gaabwe ne batunda ebintu bye babeera balimye naddala abalimi nga bakozesa emikutu egyenjawulo gye bateekawo egy'abalimi ne basobola okufuna ssente ezibabeezaawo.

Kuno agattako eky’okwongera okunoonyereza ku ngeri gye basobola okukyusa embeera zaabwe omuli okunoonyereza ku nnima ey’omulembe gye bayita ‘Urban farming’ nga basobola okulimira awatono wabula ne bakungula ebirime bye basobola okuguza abantu abenjawulo mu ggwanga.

Bino yabyogedde atongoza bbooda ezikozesa amasannyalaze e Kololo ze bagenda okukozesa okusobola okutuusa ebirime okuva mu katale okubituusa ku bantu ababeera babeetaze mu maka gaabwe.

Era yagambye ekigendererwa kyabwe kyakukozesa bbooda 1000 mu Kampala ez’okutuusa ebirime ku bantu mu maka gaabwe nga kino kigendereddwaamu n’okufunira abavubuka abenjawulo emirimu ng’oggyeeko egy’emitimbagano.