Abayizi bawangudde kavu mu mpaka z'okuwandiika emboozi empanvu ku Bajulizi

Abayizi bana okuli bannayuganda babiri, omutanzania n’omulala okuva mu Malawi bawangudde empaka z’okuwandiika emboozi empanvu ku bajulizi nga zino ziyitibwa ‘Uganda Martyrs essay writing competition’.

Empaka zino zitegekebwa Uganda Martyrs University (UMU) e Nkozi nga zaatandikibwawo mu 2023.  Ritah Precious Asiimwe okuva mu St. Charles Lwanga SSS, mu ssaza lya Kiyinda-Mityana ye yaleebezza banne.

Yaddiriddwa Eliza Andrea okuva mu Likuni Girls Secondary School mu Malawi. Owookusatu yabadde Ayoub Hamadi okuva mu Lesso Compassion Secondary School mu Tanzania. Hamadi yasibaganye ne Carolyne Mukamatalemwa okuva mu St. Maria Goretti SSS e Fort Portal.

Baabawadde ssente n’engule ku mukolo ogwabadde ku lunaku lw’abajulizi e Namugongo. Asiimwe yafunye ddoola 500 (Sh1.8million), Eliza yafunye ddoola 400 (sh1.5million) ate abaasibaganye ne bafuna ddoola 300 (Sh1.1million) buli omu.

Empaka zino zeetwabwamu amasomero aga siniya okuva mu masaza g’Obukatoliki 19 okwetooloola eggwanga.

Omwaka guno Tanzania ne Malawi nabo baazeetabyemu.

Pulof. Patrick Kyamanywa, akulira Uganda Martyrs University agamba nti abayizi 58 be beetabye mu mpaka zino olwo akakiiko ne kasunsulamu 23. Ku bano, bana be baawangudde.

Baawandiise emboozi ennyuvu ku ngeri obuwangwa gye bukwatagana n’eddiini n’engeri abajulizi gye basobola okumanyisibwa mu nsi yonna olwo nno ne kiyamba okutumbula ebyobulambuzi mu ggwanga.

Kyamanywa agamba nti empaka zino zisoomooza abavubuka okweyisa ng’abajulizi mu nneeyisa, okutya Katonda, obugumiikiriza n’obuntubalamu ne bibayamba okuvvuunuka ebizibu bye balimu n’okukulaakulanya ebitundu byabwe.