Poliisi e Nakasongola ekutte abantu 10 n'ezuula ente 38 ezigambibwa okubeera enzibe

POLIISI e Nakasongola ekoze omuyiggo n'ekwata abantu 10 abagambibwa okubeera ababbi b'ente.

 

Mungeri yeemu ente eziwera 38 ezigambibwa okubeera enzibe zizuulidwa mu muyiggo Gino.

 

Kino kyaddiridde emisango egy'enjawulo egy'obubbi bwente okuloopebwa ku poliisi e Lwampanga, Migyeera ne Nakasongola ne basuula enkessi n'okukola ebikwekweto ku byalo omuli;  Kansirye, Katitiza, Kakonde, Kitego ne Sasira mu ggombolola y'e Wabinyonyi gye yayooledde abantu bano n'okuzuula ente 38 ze bagambibwa okubba .

 

Omwogezi wa poliisi mu Savanna Sam Twineamazima ategeezezza nti ku bakwate mulimu abawera basatu abaabadde ku fayiro ku bubbi bw'ente n'abandi nga babanoonyerezaako ku bubbi bw'ente obucaase mu kitundu.

 

Poliisi esabye abantu okwongera okwekengera n'okutunuulira n'eriiso ejjogi eri be bateebereza okubeera ababbi b'ente  babaloope balwanyisibwe.

 

 

Ssentebe wa disitulikiti ya Nakasongola Sam Kigula yategeezezza nti obubbi bw'ente bucaase nnyo naddala mu ggombolola y'e Wabinyonyi, Nakitoma, Lwampanga ne Lwabyata.