Chairman Toyota alina gwawanzeeko eddusu mu kamyufu e Luwero
Jun 16, 2025
MUTO wa pulezidenti Museveni era nga ye mumyuka wa ssentebe w'ekibiina kya Patriotic League of Uganda (PLU) Mike Muwagira Toyota atadde ebbugumu mu kusunsula anaakwatira NRM bendera mu Katikamu South bwawanze eddusu ku muntu gwagamba nti gwagenda okuwagira kuba y'asobola okumegga aba NUP azze NRM kuntikko.
By Kanyike Samuel
Journalist @New Vision
MUTO wa pulezidenti Museveni era nga ye mumyuka wa ssentebe w'ekibiina kya Patriotic League of Uganda (PLU) Mike Muwagira Toyota atadde ebbugumu mu kusunsula anaakwatira NRM bendera mu Katikamu South bwawanze eddusu ku muntu gwagamba nti gwagenda okuwagira kuba y'asobola okumegga aba NUP azze NRM kuntikko.
Toyota yasinzidde ku kisaawe e Wobulenzi mu Luweero n'agamba nti azze kuyiggira Marvin Mugisha kalulu era nti wa kuyimirira naye ne mu kukanoomya okutuula lwanawangula kuba aliko bingi byagenda okukolera abantu.
"Nkimanyi nti tuli mu kwetegekera kamyufu era sandyagadde kulaga ludda naye nsazeewo mpande ku mwana wange ono eddusu mmufiireko paka kuwulira bubi kuba bingi bye yandaze byagenda okukola', Toyota bwe yagambye
Yagasseeko nti omwana ono tannayingiramu mululu gwa kulya ssente n'olwekyo tumulinamu obwesigwa n'essuubi nga aba PLU okununula Katikamu South eyagenda mu mikono gya NUP ng'ayita mu bavubuka abamuyaayanira.
Gravity ng'akuba abantu omuziki
Toyota yagambye Mugisha muyiziwe mu by'obufuzi nga yali amugaanyi okubiyingira asigale nga akyamutendeka kyokka namumatiza nti asobola okukyusa embeera n'amuleka.
Yagambye nti abantu baabulidde NRM ne beesogga opozisoni lwa bakulembeze be yagambye abalondebwa ne batakolera bantu n'obutabatusaako mpeereza za gavumenti, okulya enguzi n'ebirala ebikyayisa gavumenti n'agamba ku mulundi guno bataddewo abantu abapya abagenda okuzza NRM kuntikko.
Yasabye abagenda okuyigga obululu okubeera n'empisa nga beewala okuvuma, okutyoboola n'effujjo abantu basobole okubeesiga.
Abalala abali mu lw'okutaano lw'akamyufu ka NRM mu Katikamu South mulimu Patricia Magara nga ono ye yakwatira ekibiina bendera mu kulonda okwaggwa n'ameggebwa Hassan Kirumira owa NUP, Haji Abubaker Kalume n'abalala.
Mugisha yaloopedde Toyota ng'abantu b'e Luweero abaaleeta NRM mu buyinza bwe batali bamativu nampeereza n'asaba babazimbire ekisaawe ng'ekijjukizo nga bwe kyakoleddwa e Hoima.
Ebirala bwe bwavu obuzimbye ku bantu akayumba, abavubuka obutabeera na mirimu, okukuba aba Bodaboda ne babbibwako pikipiki n'ebirala.
Related Articles
No Comment