Omugagga w’e S. Afrika aleese ebbugumu mu kalulu ka NRM

EBBUGUMU lyeyongedde mu kuwenja akalulu ku kifo ky’anaabeera  ssentebe w’akabondo k’abasuubuzi mu kibiina kya NRM  mu Uganda yonna.
Kiddiridde omuwi w’amagezi wa Pulezidenti Yoweri Museveni ku nsonga z’ebyobusuubuzi, era omugagga omugundiivu e South Afrika, Phillip Kakuru, naye okwegatta mu lwokaano luno.
Kakuru, yatandise okutalaaga  ebitundu by’eggwanga ng’asisinkana  bassentebe b’abasuubuzi mu NRM, abaayitamu mu kulonda okwakaggwa ku mitendera gya disitulikiti okubakakasa nti y’asaanidde okuba eddoboozi lyabwe.
Ku Lwomukaaga oluwedde, yayise ekibinja kya bassentebe abava mu bitundu bya Buganda nga bakulembeddwaamu Karim Karamagi ow’omu massekkati ga Kampala (Kampala Central), Yusuf Kyambadde owa Mpigi, Kenneth Mayanja owa Kalungu, Godfrey  Kizza okuva e Kyankwanzi, Justine  Nabuuma owa Masaka, Joseph Mary Kasozi owa Kalangala ne Muzafaru Bwogi owa Lyantonde.
Abalala ye; Sulaiman Samula owa Kyotera, Amuza Kiwanuka okuva  e Buvuma, Emmanuel Kalekeezi owa Kiboga, Sula Munene owa  Butambala, Christopher Bagonza
okuva e Nakasongola n’abalala, okubanjulira enteekateeka z’alina n’okwegeyaamu ku ngeri gye bayinza okusitula embeera y’abasuubuzi mu ggwanga.
Kakuru yategeezezza nti bukya kifo kya ssentebe w’abasuubuzi mu NRM  kitandikibwawo kati emyaka abiri, eddoboozi ly’abasuubuzi libadde teriwulikika olw’abakulembeze baabwe okwefaako  bokka mu kifo ky’okusoosowaza ensonga z’abantu abaabalonda  nga babalwanirira ku misolo emingi egibali mu bulago.
Yagambye nti NRM kibiina kiganzi nnyo kubanga kiyambye  abasuubuzi ne bankola gyange okwetonderawo emirimu egy’enjawulo nga teri abakuba ku mukono kyokka olw’obukulembeze obubi obubaddewo, okusika omuguwa kuzze kuwulirwa wakati
w’abasuubuzi ne gavumenti nga kiva ku misolo egibabinikibwa nga teri aboogerera. Kino yakitadde ku buli bw’enguzi n’abakulembeze abeefaako bokka ng’abantu mu
kifo ky’okusoosowaza ensonga eziruma abasuubuzi.
Okwogera bino, Kakuru yabadde atongoza ekibiina ky’abasuubuzi eky’obwegassi ekisookedde ddala mu byafaayo bya NRM, ki Uganda NRM Entrepreneurs League Members and Credit Cooperative Society Limited. Yakitaddemu obukadde bw’ensimbi
za Uganda 100 era n’asuubiza nti bwe bamulonda, ajja kubasakira baweze obuwumbi 34, kibayambe nabo okwenyumiriza mu gavumenti ng’abawi b’omusolo.
Ono era yawaddeyo ofiisi ye esangibwa e Bugoloobi mu divizoni y’e Nakawa, etandike okutambulizibwamu emirimu egikwata ku basuubuzi mu kibiina kya NRM, era nga yeesookedde ddala.
Akulira ofiisi ya ssentebe wa NRM mu ggwanga era nga  muwi we ow’amagezi ku nsonga z’abavubuka, Hajjati Hadija Namyalo wamu n’avunaanyizibwa ku nsonga za bannakibiina kya NRM  abali emitala w’amayanja, Amb. Abbey Kigozi Walusimbi, nabo
mu nsisinkana eno baabaddewo era ne basiima nnyo enteekateeka y’ekibiina kino.
Namyalo yagambye nti Bannayuganda baakoowa ebigambo kuba tebabirya bw’atyo n’asiima Kakuru olw’okuvaayo n’alwanirira eddoboozi ly’abasuubuzi wamu ne ssentebe wa KACITA, Thadeus  Musoke Nagenda. Yagambye nti Kakuru, yamumanyira mu lukiiko  olumu lwe baalimu ne Pulezidenti Museveni, n’alambika bulungi ensonga eziruma abasuubuzi ekintu ekyali kyalema buli omu.
Kaminsona avunaanyizibwa ku babaka ba gavumenti (RDCs) mu ggwanga, Fred Bamwine, yategeezezza nti NRM etandise okufuna essuubi olw’abantu nga  Kakuru abavuddeyo okulwanirira  abasuubuzi, era n’asaba abalonzi obutabasubya mukisa guno,
bamuyiire obululu mu ttabamiruka anaabaawo mu October, omwaka guno mu kisaawe e Namboole. Abalala abavuganya ku kifo kino kuliko omubaka wa palamenti akiikirira ekitundu kya  Mbarara Division North, Robert Rukaari, eyaliko omubaka wa Tororo Munisipaali, Sanjay Tanna, wamu n’eyaliko mu kifo kino Hajji Hassan Basajjabalaba