Nalukoola awadde ensonga 14 ku kujulira mu musango gw’okumugoba mu Palamenti

MUNNAMATEEKA Luyimbaazi Nalukoola era omubaka wa  Kawempe North mu Palamenti akoze okujulira mu musango  gw’ebyokulonda ogwamuwawaabirwa  Faridah Nambi,  n’awa ensonga 14 kkooti kw’eba esinziira okusazaamu ensala ya kkooti enkulu.
Mu kujulira kuno Nalukool   akiikiriddwa kkampuni za Bannamateeka mwenda okuli; Nalukoola  Advocates and solicitors, Nyanzi, Kiboneka and Mbabazi Advocates, Pace Advocates, Alaka   and Company Advocates, Kaganzi and Company Advocates, Mbabaali Jude and Company Advocates, Reeve Advocates, Ahamark Advocates ne LMN Advocates.
Nalukoola ayagala kkooti ejulirwamu eddemu emukakase ng’omubaka omutuufu owa
Kawempe North, oba eragire omusango guno guddemo okuwulirizibwa mu kkooti enkulu nga guweereddwa omulamuzi omulala.
Nalukoola agamba nti, Omulamuzi  Bernad Namanya yalemwa okwetegereza obulungi ensonga, n’atagoberera nsala za kkooti esingako ezaasooka, mu misango ebiri Dr. Kiiza Besigye gye  yawawaabira Yoweri Musevenimu 2001 ne 2006, kkooti bwe  yakizuulira nti, wadde okulonda kwalimu ebirumira naye byali ebimala kuddissaamu kulonda.
Nalukoola era agamba nti, omulamuzi Namanya yakola ensobi mu nsala ye, bwe yagamba  nti, abalonzi 16,640 abaali mu bifo 14 obululu gye butaabalwa  baggyibwako eddembe lyabwe ery’okulonda era okulonda n’akusazaamu.
Wano Nalukoola agamba nti, omulamuzi teyeetegereza bantu batajja kulonda mu Kawempe  yonna, n’alowooza nti, abalonzi abo 16,640 bonna baali bajja kulonda ate balonde Nambi yekka ekintu ekitasoboka.
Nalukoola era yeemulugunya  nti, omulamuzi yamuggyako omukisa ogw’okukunya
abamu ku bajulizi Nambi be  yaleeta okumuweera obujulizi, ate n’abwesigamako mu nsala  ye n’asazaamu okulonda ekiraga butali bwenkanya. Okulonda kw’e Kawempe  kwaliyo nga March 13, 2025, nga  kwali kwa kujjuza kifo ekyalimu Muhammad Ssegirinya eyafa mu January w’omwaka guno. Nalukoola yawangula n’obululu 17,939 ate Nambi n’amuddirira n’obululu  9,058.
Kyokka Nambi teyamatira n’engeri okulonda gye kwatambulamu n’asalawo okuddukira mu kkooti.