Ebikwekweto bya poliisi biyodde 91

POLIISI mu Kampala n’emiriraano ekoze ebikwekweto mw’ekwatidde abagambibwa okwenyigira mu bumenyi bw’amateeka 91.
Ebikwekweto bino byakoleddwa poliisi okuli ey’e Kira, CPS n’abajaasi ba UPDF mu Kampala n’e Mukono ku Lwokusatu ekiro.
Amyuka omwogezi wa poliisi mu Kampala n’emiriraano Luke Owoyesigyire yagambye nti, poliisi okukola ebikwekweto bino kyaddiridde okufuna okwemulugunya okuva mu batuuze ku bumenyi bw’amateeka obweyongedde naddala ekiro.
Yagambye nti, poliisi ya CPS ekikwekweto kye yakoze kyayodde abantu 60 nga kyayindidde ku Top Pub esangibwa ku William Street, ppaaka enkadde, Wilson Road Shoprite ne Cooper Complex. Abaakwatiddwa baasangiddwa mu bifo ebimanyiddwa okubeeramu abamenyi b’amateeka ng’abanyakula amasimu n’okusika ensawo ku bantu.
Yategeezezza nti, poliisi y’e Kira yakoze ekikwekweto mu bitundu by’e Najjeera, Bulindo ne ku Shimon nga yakutte abantu 30 ng’abamu baasangiddwa n’emisokoto gy’enjaga.
E Mukono ku kyalo Kiwala mu ggombolola y’e Nama abaserikale ba poliisi baayodde abantu 9.