Omukazi akoze olutalo nga muganzi we amulumbye gyeyafumbirwa
Jun 18, 2025
Omusajja alondodde eyali muganzi mu maka gyeyafumbirwa nga amubanja omwana gweyamuzaala emyaka 13 egiyise, omukazi atabuse n'akwata omusajja amataayi era bagenze okubataasa nga omusajja oluyi lumuyiseemu.
By Saul Wokulira
Journalist @New Vision
Omusajja alondodde eyali muganzi mu maka gyeyafumbirwa nga amubanja omwana gweyamuzaala emyaka 13 egiyise, omukazi atabuse n'akwata omusajja amataayi era bagenze okubataasa nga omusajja oluyi lumuyiseemu.
Samson Tumusiime 32 agenze ku disitulikiti e Kayunga n'anona Collins Kafeero ow'amaka, abaana n'eddembe ly'obuntu ppaka ewa Scovia Nalumaga 30, gyeyafimbirwa nga ayagala bajjeyo omwana Tumusiime amutwale.
Tusiime ng'akubira mukoddomi we
Bino bibadde ku kyalo Bakkuta mu muluka gw'e Lusenke, ggombolola y'e Busaana mu Kayunga wabula ye Tumusiime aviiridde ku kyalo Katikanyonyi mu ggombolola y'e Nazigo eno nga gye bazaala Nalumaga.
Wadde Tumusiime alumirizza bweyafunyisa Nalumaga olubuto nga akyabeera mu maka ga bazadde be, ye Nalumaga yegaanyi kubula kukomba ku ppaasi nti Tumusiime tamuwanga ku lubuto.
Tumusiime agambye nti Nalumaga amulangira obumpi n'obusiwuufu wabula mu kiseera kiri nga amulyako ssente ebyo nga teyabiranga.
Nalumaga obwedda tayagala Tumusiime ayogere wabula nga Tumusiime afukumula ebigambo nga bweyaguliranga omukazi amayuuni era nti waliwo ne lweyamuwanulira ekibbo ky'emiyembe Nalumaga n'akyeggweera.
Nalumaga akalambidde nti omwana yamuzaala mu Katumba ow'e Luweero era nga yatuumibwa n'amannya ag'ekika ky'e nkima n'asomooza Tumusiime nti oba nga akakasa omwana wuwe bamutwale akeberebwe endaga butonde (DNA).
Abataka okubadde omukadde Beatrice Nazziwa ne ssentebe wa LC II e Lusenke Ofumbi Pasikaali Ofwono bazze era ne bawa Tumusiime ne Nalumaga amagezi batwale omwana akeberebwe.
Nalumaga atutte Kafeero ku ssomero omwana gy'asomera amulabe oba nga alinako w'afaanana Tumusiime amwesibako.
Kafeero abasabye bombi bakuume emirembe era nti ensonga gavumenti egenda kuzigoberera ppaka nga amazima gazuuse omwana abeere w'ateekeddwa okubeera..
Related Articles
No Comment