Batongozza okubala takisi zonna

EKIBIINA omwegattira ebibiina bya takisi byonna  mu ggwanga ekya UTOF, kirangiridde enteekateeka ez’okubala mmotoka  zonna ezikola eziri mu mulimu guno zonna mu ggwanga. Ssentebe wa UTOF, Rashid  Sekindi yategeezezza nti, enteekateeka eno yatandikidde mu Kampala eggulo ku Lwokubiri nga basuubira omulimu okugumaliriza mu wiiki emu.
Ssekindi yategeezezza nti, takisi zigenda kubalibwa mu bifo mwe zisimba n’annyonnyola nti, mmotoka ezikolera mu bitundu bya Kampala, Mukono, Wakiso ne Mpigi buli ebalibwa egenda kussibwako ‘sitiika’ eriko ebigambo nti, ‘Kampala Chapter’.
Takisi ezikolebwa mu bibitundu eby’omu, Masaka, Lwengo, Kalungu, Lyantonde ne   akai zaakussibwako ‘Greater Masaka Chapter’, ez’omu bitundu eby’omu Buvanjuba zissibweko, ‘Eastern region chapter’, ez’omu Bugwanjuba zissibweko ‘Western Region
chapter, ate ez’omu bukiika kkono zissibweko, ’Northern Region chapter . Ssekindi yategeezezza nti, sitiika eriko nnamba okuva ku 001 okutuuka ku 30,000 n’agattako
nti, sitiika zino zigenda kuyamba okulondoola buli mmotoka okusoboloa okunyweza ebyokwerinda by’abasaabaze n’ebintu byabwe wamu n’ebyokwerindaby’eggwanga.
Omulimu gw’okubala takisi, Ssekindi yagambye nti, gugenda kukolebwa abakulembeze mu paaka n’ebifo ebirala takisi we zisimbibwa. Yagambye nti, buli takisi yaakusasula 1,000/- oba 2,000/- nga za kyeyagalire