Ababadde basabira omugezi abadde amaze wiiki ssatu nga mufu bakwatiddwa poliisi

Abantu basatu abeeyita Abasumba abagambibwa okwekobaana basabire eyabadde afudde nti azuukire, bakwatiddwa.

Bibadde Butinindi mu muluka gw'e Terere e Ntenjeru - Kisoga mu disitulikiti y'e Mukono, oluvannyuma lw'omutuuze Asse Segawa 40 okulwala, n'afiira mu mikono gy'abantu bano.

Kigambibwa nti Segawa, amaze wiiki nga ssatu nga mulwadde era abantu be kwe kumukwasa Nabbi Margaret Nelima  eyasazeewo okumusabira nga tafunye bujjanjabi bwonna, kyokka n'afa ate era ne basigala n'omulambo mu nnyumba kumpi ennaku ssatu nti nga bamusabira asobole okuzuukira.

Amyuka omwogezi wa poliisi mu Kampala, Luke Oweyesigyire, avumiridde ekikolwa kino era n'agamba nti bakutte Paster Eseza Nakalazi 65, nga ye nnyina w'omugenzi, Paster Suzan Nakonde mwannyina ne Margaret Nelima nga yeeyita Nabbi.

Babagguddeko emisango gy'obulagajjavu nga n'omulambo ogubadde gutandise  okuvunda, gutwaliddwa mu ggwanika, okugwekebejja.