Abavubuka batongozza kampeyini y'okuyiggira Museveni akalulu mu Kampala ne balabula

ABAVUBUKA ba NRM mu Kampala Central batongozza enkola y’okuyiggira pulezidenti Museveni obululu n’abakwatidde ekibiina kyabwe kaadi ne balabula nti tewali kwekalakaasa mu kulonda.

Bayisizza ebivvulu nga bwe basomesa ebirungi ebikoleddwa NRM n’okusaba Bannakamwokya balonde Pulezidenti Museveni, balonde Hajjat Minsa Kabanda ku bubaka bwapalamenti, balonde Salim Uhuru ku bwammeeya bwa Kampala Central.

Minisita Minsa Kabanda yatongozza kaweefube ono ng’ali n’abakungu okuva mu maka g’obwapulezidenti okuli Amina Mukalazi, ne Ahmed Mukono ssaako abakulembeze b’abavubuka okuli Fahad Lukwago, Grace Nakibuuka, Ismail Tibamwenda, Pascal Mugisha, Japhali Ssali ne Alex Byaruhanga.

Ebibinja by'abavubuka bibadde byegattira mu kibiina kya Kampala Central Youth Brigade omuli n’aba Gheto abakulirwa Shafik Kalyango bonna abayisizza ebivvulu era minisita Kabanda n'alangirira nti byonna babikola kuteekateeka bavubuka okwaniriza Pulezidenti Museveni ng’ayingira Mpigi.

Fahad Lukwago ne Ismail Tibamwenda baategeezezza nti kaweefube gwe baliko waakulaba nti Kampala awangulwa NRM.