Poliisi ekutte 5 mu kampala ku by'okubbisa emmundu n'okutta abantu!

Poliisi mu Kampala ekutte abantu bataano abagambibwa okuba nga baludde nga beeyambisa emmundu okutta, okulumya n'okubba abantu.

Okubakwata, kiddiridde amawulire ag’ekikessi mwe baakoledde ekikwekweto mu zzooni ya Kiti A mu muluka gw'e Kirnnya e Bweyogerere mu Wakiso okuva ku wiikendi okutuuka leero.

Abaakwatiddwa, kuliko Robinson Amutuhairwe nga yaliko omujaasi, Daniel Okello ng'ono mukuumi wa fortebet, Arafat Kasango, Joseph Innocent Luyirika, ne Daniel Alphonse.

Mu kiwekweto kino, kitegeezeddwa nti emmundu ssatu baazizudde ne magaziini ssatu wamu n'ebizibiti ebiwerako.

Mu kubakunya, kigambibwa nti abakwate bakkirizza nga bwe beenyigira mu kukuba OC wa poliisi y'e Ntaawo Emanuel Bagenda amasasi agaamutta nga November 23, 2025 ku Ntaawo - Nyenje Rd e Mukono.

Ono yali  n'omuserikale omulala nga bagezaako okuwondera ababbi abaali bamaze okubba mu kitundu ekyo ekiro. Omuserikale omulala naye yakosebwa!

Omwogezi wa poliisi mu Kampala, Racheal Kawala, agambye nti era abakwate, bakkirizza nga bwe baludde nga beenyigira mu bubbi obw’enjawulo omuli n'obwa mobile money mu Kampala, n'emiriraano.

Ayongeddeko nti omuyiggo gw'abalala abali mu kibinja kino, Gugenda mu maaso.