Omuduumizi wa Poliisi mu Kampala omuggya alaze w’atandikira
OMUDUUMUZI wa Poliisi mu Kampala n’emiriraano omuggya, ACP Ezekiel Emitu ayingidde ofiisi n’aweebewa ebiragiro okulwanyisa obubinja bw’abamenyi b’amateeka obutadde Kampala n’emiriraano ku bunkenke.
Omuduumizi wa Poliisi mu Kampala n’emiriraano omuggya, Emitu (ku kkono) ne Ecega gwe yaddidde mu bigere.
OMUDUUMUZI wa Poliisi mu Kampala n’emiriraano omuggya, ACP Ezekiel Emitu ayingidde ofiisi n’aweebewa ebiragiro okulwanyisa obubinja bw’abamenyi b’amateeka obutadde Kampala n’emiriraano ku bunkenke.
Eggulo, Emitu yakwasiddwa ofiisi ng’adda mu bigere bya Richard Ecega ng’omukolo gwetabiddwaako akulira ebikwekweto mu Poliisi, Frank Mwesigwa. Mwesigwa yategeezezza nti, ekibuga Kampala kirina okubeera ekitebenkevu kuba gwe mutima gw’eggwanga n’amugamba essira alisse ku kulwanyisa obumenyi bw’amateeka ng’awa abaserikale ebiragiro okumaamira ebifo ebimanyiddwa omuli obubinja bw’abamenyi b’amateeka.
Emitu yatandikiddewo emirimu nga yasoose kusisinkana abaserikale abatuula ku kitebe kya Kampala n’emiriraano n’abaduumira ebitundu ebikola Kampala n’emiriraano.
AB’E KAWEMPE BALAAJANA
Poliisi e Kawempe wadde ezze ekola ebikwekweto n’eyoola abakulira obubinja buno, wayita ennaku ntono ne babayimbula.
Muhamad Kintu ow’e Kanyanya yagambye nti, waliwo ababbi abasula mu mataawo okuli ery’oku Kaleerwe, Bwaise, Kawaala, Kyebando n’awalala. John Kalule ow’e Mulago yanokoddeyo obubinja okuli; Fangoni, Scorpion Gang abasinziira e Bwaise, Lost City e Mulago Nsooba East, Biddugubidugu mu lufula y’oku Kaleerwe, Wolf Gang e Mulago nga kaduumirwa Eddie .
Obubinja buno buli kamu kalina oluguudo lwe keekwata. Okugeza ekkubo lya Sir Apollo Kaggwa eyali aduumirawo eyali amanyiddwa nga Taata Topi yakwatibwa kyokka omumyuka we, Amoti kati y’aduumira akabinja kano. Ku Mawanda okuva ku Kaleerwe okutuuka e Kamwokya, waduumirwa Ric Man.
Ate Nkwanga y’aduumira ababbira ku Alice Kaggwa, olw’e Ttula, Mpereerwe –Nammere. Bano babbisa biso era gye buvuddeko babba ssente e Nansana, poliisi n’ekwata Twaha Nsubuga wabula n’ayimbulwa.
Waliwo akaduumirwa Gerald nga bano batambulira ku pikipiki ne banyakula ebintu ku batambulira ku mabbaali g’oluguudo ne mu jjaamu e Bwaise ne Mpereerwe. Akalala k’e Kyebando nga kakulirwa Kambugu ne Daleni. Bano batambula n’ebijambiya nga katuula ku kasaawe e Kyebando okumpi ne kkampuni y’Abachina. Kano gye buvuddeko ke kaggyirayo Omuyindi ebiso ne kamubbako ssente era baakwatibwa wabula ne bayimbulwa.
Omwogezi wa Poliisi mu Kampala n'emiriraano, Rachael Kawala yagambye nti, Poliisi ekola ebikwekweto emisana n'ekiro.
ABAAYINGIRIDDE OMUMYUKA WA MMEEYA BAKWATIDDWA
Abavubuka babiri abagambibwa okutigomya Gaba mu kabinja ak’omutawaana akamanyiddwa nga Gaba Gaaza bakwatiddwa. Bano be bamu ku baalumbye amaka g’omumyuka wa Mmeeya e Makindye, Joseph Bbaale Bwanika. Abaakwatiddwa kuliko Tom Washega ne Benjamin Muwonge nga poliisi y’e Kibuli yabakwatidde Kibiri mu Makindye Ssaabagabo. Bagguddwaako emisango ku ffayiro nnamba SD Ref: 17/21/02/2026.
Abakulembeze b’e Gaba baategeezezza nti, kano kamu ku bubinja obw’omutawaana mu Gaba. Bano amakanda baagasimba mu biyumba ebitannaggwa nga bakulemberwa Rasta Keiyz.
BAKUTTE ABASOBYA KU BAKAZI E MBALWA
POLIISI ekutte abagambibwa okukwata abakazi mu bitundu by’e Mbalwa, Namugongo mu Munisipaali y’e Kira mu Wakiso.
Amyuka omwogezi wa Poliisi mu Kampala n’emiriraano, Luke Owoyesigyire, yategeezezza nti, abavubuka 28 be baayooleddwa mu ppaaka ya ttakisi e Kira, Namugongo, Kitikifumba, Kamwokya, Kyanja, Kisaasi, Shimon, ne Wantoni e Mukono. Abaakwatiddwa baasangiddwa n’ebintu ebiteeberezebwa okuba ebibbe, ebyuma ebikozesebwa mu kumenya amayumba, amasimu, ebissi ne zikompyuta ze babadde bakozesa okuggya paasiwaadi n’okukyusakyusa amasimu ge babba.
Abantu 109, be baakwatiddwa nga kuliko ababba bodaboda, abatunda ebiragalalagala omuli enjaga, abakwata abantu embadiya ne babanyagako ssente, ensawo z’abakazi, amasimu n’ababba nnamba puleeti ku mmotoka. Poliisi etaddewo amateeka nga tebakkiriza babodaboda kusimba kumpi ne bbanka, okutangira ababbi okulondoola abaggyayo ssente
ETTEMU E BULOBA
OMWANA Fred Bwooye 12, bamufumise ebiso, omulambo gwe ne bagusuula mu lutobazzi. Ettemu lino libadde Buloba mu disitulikiti y'e Kamuli. Omugenzi abadde mutuuze w'e Butansi mu disitulikiti y'e Buyende era kigambibwa nti, yasembye okulabwako ku pikipiki ng’ali ne David ow'emyaka 25. David mutuuze w'e Mukoka mu muluka gw'e Mpakitoni mu Ggombolola y'e Bulopa. Omwogezi wa poliisi mu Busoga North, Samson Lubega agambye nti, omulambo bagusanzeeko ebiwundu eby’ebiso. Baagututte mu ddwaaliro lya Kamuli General Hospital okugwekebejja nga bwe bayigga omutemu.
ASSE BBA E MASAKA
POLIISI e Masaka eyigga omukazi agambibwa okufumita bba ekiso n'amutta. Vincent Mirembe 38, ow’e Mizinga mu Kitengeesa Ward mu divizoni y’e Nyendo - Mukungwe e Masaka ye yattiddwa. Abadde avuga booda ku siteegi ya Agip mu kibuga Masaka. Omwogezi wa Poliisi e Masaka, Twaha Kasirye, agambye nti, mwannyina w'omugenzi, Ritah Nakiruuta ye yategeezezza aba ffamire ne poliisi, Vincent n'addusibwa mu ddwaaliro e Masaka gy'afiiridde. Agasseeko nti, omulambo baagwekebezze ne baguwa abooluganda okuziika nga bwe bayigga mukyala we.
BAKUTTE SSENTEBE E NATEETE
POLIISI e Nateete ekutte Ssentebe wa LC1 n'abantu abalala babiri nga bagambibwa okukuba omusajja ow'emyaka 63 ppeeva ku mutwe. Byabaddewo nga January 15, bwe baakubye Polly Kibirige Ssekiranda ow'e Kitebi Cell e Mutundwe mu Lubaga, ne bamuleka ng'azirise. Ono yabadde adda waka ng'ava okulonda ku Kitebi P/S era abazirakisa baamuddusizza ku Kitebi Family Clinic and Medical Centre gye yaggyiddwa ne bamwongerayo e Mulago gy’ajjanjabirwa. Poliisi eggulo yakutte Henry Kasule 66, nga ye ssentebe wa LC I e Kitebi Cell, Furik Seviiri ne Andrew Kitega Kyemwa 50 nga naye w'e Kitebi.
BABAKUTTE LWA KUNYWA NJAGA
ABAVUBUKA bana abagambibwa okunywera enjaga waggulu ku kizimbe e Busega, poliisi e Nateete ebakutte. Bano kuliko Shafik Kasozi, Godwin Nasasira, Mike Talemwa ne Wilson Nabasa. Kigambibwa nti, babasanze n'emisokoto gy'enjaga. Omwogezi wa Poliisi mu Kampala, Recheal Kawala, agambye nti e Bweyogerere mu Central Zooni ne Wellspring Zooni nayo bakozeeyo ekikwekweto, ne bakwata 18 n’agamba nti bakyagenda mu maaso n’okufuuza abamenyi b’amateeka.
AKWATIDDWA KU BY’OBUTEMU
OMUSAJJA agambibwa okuba ow’omutawaana mu kubba, okutemula n'okutulugunya abantu, poliisi emukutte. Grace Nabeeta amanyiddwa nga FBI Escobar, y’akwatiddwa nga bamulumiriza okutta Richard Batabane ow'e Kiwafu, Ntebe. Amyuka omwogezi wa Poliisi mu Kampala, Luke Oweyesigyire, agambye nti, bakyamubuulirizaako.