Amawulire
Museveni awadde bamakanika e Wakiso akawumbi kamu n'obukadde 300
PULEZIDENTI Museveni awadde bamakanika akawumbi kamu n’obukadde 300 okwongera omutindo kumulimu gwabwe ssaako okwongera okwekulakulanya mumulimu gw’okukanika gwebakola.
RDC e Wakiso, Angel Namulembe ng'awaayo ssente
By: Peter Ssaava, Journalists @New Vision
PULEZIDENTI Museveni awadde bamakanika akawumbi kamu n’obukadde 300 okwongera omutindo kumulimu gwabwe ssaako okwongera okwekulakulanya mumulimu gw’okukanika gwebakola.
Ssente zino zaabasubizibwa Pulezidenti Museveni bweyali anoonya akakulu mukulonda kwa 2026 nga kuzino yasoose kubawaako obukadde 300 olwo akawumbi kabawebwe mu mwezi gwa July nga bamaze okulaga bwebakozesezza ssente zino.
RDC we wakiso ng'ayogerako ne bamakanika
Ssente zino zaabakwasiddwa omuyambi wa RDC e Wakiso, Angel Namulembe ku Lwokuna ng’ono yabakubirizza okuzikozesa obulungi nga bayita mu SACCO yaabwe gye baakola okulaba nga buli makanika aganyulwamu.
“Singa mukozesa bulungi ssente zino engeri gyeziri ez’okuzaayo, kijja kuyamba nebamakanika abalala okuziganyulwamu ate buli omu akulakulane kuba gwemulamwa Pulezidenti Museveni gweyali akubiriza.” Namulembe bweyayongeddeko.
Yebazizza Pulezidenti Museveni olw’okutukirizza ekisuubizo kye okulaba ng’addukirira bamakanika ne ssente ez’okwejja mubwavu era nasekerera abo abaali balowooza nti yasuubiza mpewo.
Bamakanika nga bafuna ssente
Ssentebe wa SACCO yabamakanika mu Wakiso, Ezekiel Wafula yasiimye nnyo Pulezidenti Museveni olw’okubaddukirira era nategeeza nti obukadde 300 obwasoose okubawebwa bagenda kuzikozesa bulungi kibasobozese okufuna akawumbi nga tewali bukwakkulizo.
“Nkakasa nti bamakanika ssente zino bajja kuzikozesa bulungi kuba zakwewola wabula ssikugaba, sisuubirayo makanika agenda kuzirya kuba tubayisizza mumisomo era bangi betegefu okutambula n’enkulakulana.” Wafula bweyayongeddeko.
Yategezezza nti bamakanika bebawadde bazooka kubekennenya ssaako okubasaba ebiwandiiko bya garage zebakoleramu era nebabalondoola okukakasa nti tebawa bantu ba mpewo ekintu ekiyinza okutta omulamwa gwabwe.
Makanika ng'akutte ssente
Yasabye Pulezidenti okutunulamu ku beeyi ya sipeeya kuba bangi bakalubirizibwa okukanika mmotoka olwa sipeeya okuba ku buseere ate nga n’omulala tali kumutimdo ekivirako mmotoka okufa buli kiseera