Abatemu be baaguze okutta omusuubuzi basseemu omugenyi
POLIISI ekutte abantu bana okuli n’omukazi ku bigambibwa nti bali mu kibinja ekyapangisibwa okutta abantu ku ssente eziri wakati w’emitwalo 20 ku 35.
Omusuubuzi Kasirye, yattiddwa ne Makumbi, omugenyi eyattiddwa
POLIISI ekutte abantu bana okuli n’omukazi ku bigambibwa nti bali mu kibinja ekyapangisibwa okutta abantu ku ssente eziri wakati w’emitwalo 20 ku 35.
Okukwatibwa kwabwe kuddiridde abantu abaasasulwa emitwalo 35 okutta omusuubuzi e Luweero kyokka ne batemulamussaalumanya eyabadde akyadde awaka!
bakyalya butaala.
Ettemu lino lyali ku kyalo Kannamunungu mu Kayindu mu ggombolola y’e Bamunaanika, mu Luweero, Kasirye gye yalina ffaamu. Ye Kasirye, yali omubazi w’ebitabo, nga mutuuze e Ntinda mu Kampala.
Poliisi mu bantu be yakutte, mwe muli omukazi Eva Nakitto. Nakitto yali agugulana ne Kasirye mu kkooti ku nsonga z’ettaka, nga kigambibwa nti yatuuka n’akoowa okwewuuba mu kkooti, kwe kusalawo akozese ejjambiya okugonjoola obutakkaanya. Kigambibwa nti Nakitto yatuukirira omusamize Godfrey Ssali ng’ayita mu muvubuka Isma Ntale aloope Kasirye mu bajjajja. Bwe yatuuka eno, Ntale ne Ssali, ne bamufunira
omuvubuka omulala Godfrey Kiggundu, eyaggusa minsoni y’okutta Kasirye.
Kigambibwa nti mu kwewozaako, Nakitto, yategeezezza nti yali akooye okuwerennemba n’omugagga mu kkooti ku ttaka eryamulekerwa kitaawe Omugenzi
Christopher Kasule.
Yannyonnyodde nti, kitaawe wa Kasirye, (Paionita Ssemalulu) nga tannafa naye yamujoonyesa nnyo ku ttaka lino, kyokka olwafa, mutabani we n’atandikira kitaawe we yakoma. Yatuuka n’awulira ng’okwewuuba mu kkooti kumukeese, n’asalawo okupangisa abacuba bamuyambeko mu nsonga eno.Yagambye nti, Ntale yasooka n’amutwala mu ssabo lya Ssali, bajjajja bakole ogwabwe, kyokka bwe batuukayo, Ssali
abangi gwe bamanyi nga ‘Muzeeyi’ n’abawa amagezi bapangise omutemu amalirize Kasirye, oluvannyuma ng’abakakasizza nti yali asobola okusiba omuzimu gwe ne watabaayo amanya ani yakikoze. Nakitto, agamba nti ettaka eryogerwako lisoba mu yiika 20, era nga kitaawe Kasule, yaligula ku Asuman Mivule, mu 1954.
GWE BAATUMA YATTA MULALA
Christine Mbawadde, Nnamwandu w’omugenzi Makumbi, yategeezezza, nti bba okuttibwa yali afulumye ebweru ng’agenze okweteewuluza abatemu gye baamuvumbagirira ne bamusanjagaebiso ku mutwe, mu bulago,ne ku mugongo, n’afa.
Godfrey Kiggundu, agambibwa okutta Makumbi ne Kasirye yatutte Poliisi n’agiraga engeri gye yattamu Makumbi, kyokka n’asaba ekisonyiwo ng’agamba nti, Isma Ntale,
n’omusawo w’ekinnansi, Godfrey Ssali, be baamuwabya. Yannyonnyodde nti, ddiiru gye
baamuwa yali yakutta Isaac Kasirye, era baamuwa emitwalo 35, gimuyambeko mu by’entambula nga bamukakasizza nti, Kasirye, yali azze mu nnyumba ye ey’oku ffaamu, e Bamunanika era awaka tewaaliwo muntu mulala. Nti kyokka yali tamanyi Kasirye bw’afaanana, olwalengera omusajja akuliridde ng’agenda mu kaabuyonjo, n’alowooza nti Kasirye. Yamulinda n’asooka amaliriza emikolo egimututte mu kaabuyonjo, bwe yali
afuluma n’amusanjaga ebiso eby’okumukumu n’agwa wansi, amangu ago, n’amusalako akagoye ku ssaati nga bwe yali alagiddwa, n’ayota. Kyokka Kiggundu agamba nti yasoberwa enkeera, Ssali ne Ntale, bwe baamutegeeza nti, omunt gwe yali asse yali mulala sso si Kasirye!
Yasaba bamwongereyo emitwalo 20, addeyo okutta omutuufu, era olwazimuwa, n’addayo n’atta Kasirye, gwe yalumba obutereevu mu nju mwe yali, n’amusanjaga ebiso ebyamutta!
Yagaseeko nti, Ntale ne Ssali buli lwe babadde bamutuma okutta, bamuteekako ebiragiro
ebikakali omuli okusala akagoye ku mpale, essaati, bulawuzi, oba okufuna akatambaala k’omu ngalo okuva ku muntu attiddwa akaliko omusaayi bye batwala mu ssabo nti basibe omuzimu.
SSALI AYOGEDDE
Ssali yasoose ne yeegaana eby’ejjambiya ebbiri ezaakozesebwa mu ttemu lya Makumb ne Kasirye kyokka oluvannyuma w’okukunyizibwa abamu ku baakola nabo, okwabadde Immaculate Nakanwagi, baatutte abaserikale ba Flying Squad, mu nimiro we baabadde bazikukulidde n’ebintuebirala okwabadde n’essaawa y’omu ku battibwa. Kigambibwa nti abasajja bano bateeberezebwa okuba nga bazze beenyigira mu ddiru z’okutta abantu mu bitundu by’eggwanga eby’enjawulo olw’obumalirivu bwe balina n’ebissi ebirala ebyazuuliddwa ewa Kiggundu ne Ssali mu maka gaabwe ag’enjawulo.
Poliisi be yakutte kuliko; Isma Ntale, amanyiddwa nga ‘Brown’, Julius Ssali, Godfrey Kiggundu, ne Immaculate Nakanwagi, nga batuuze ku kyalo Bbuto mu Kyampisi mu Bamunaanika e Luweero.