Amasomero 5 gaggaddwa e Wakiso lwa butaba na layisinsi

EKIRAGIRO kya minisitule y'ebyenjigiriza n'emizannyo ku kuggala amasomero agatalina layisinsi kyongedde okunyinyiitira mu disitulikiti y’e Wakiso, bwe baggadde amasomero 5 agasomesa abayizi mu bumenyi bw'amateeka.

Ekimu ku kisulo bwe kyabadde kifaanana mu ssomero erimu lye baagadde.

Abeebyenjigiriza baalambudde essomero lino ne bazuula nga kaabuyonjo eriwo emu ate nkyafu nnyo, akasulo abayizi mwe basula yakayigiikiriza kumpi n'ebibiina ate nga n'abasomesa tebalina buyigirize bumala.

Omusomesa gwe baasanze nga yeebase mu kisulo ky'abaana.

Bano baaliggadde era ne balagira Dennis Kateregga omutandisi w'essomero lino okusooka okufuna layisinsi ssaako okuggya ekisulo ku ssomero kuba we kiri tekisaanidde olwo balyoke bamukkirize okuddamu okusomesa.

Essomero eddala eryaggaddwa liyitibwa Margaret Bright Junior School e Nsangi  nga nayo baakunyizza nannyini ssomero lino Regina Namusoke ku lwaki asomesa nga talina layisinsi.

Embeera y'ekifo we batereka ebintu bwe yabadde efaanana.

Baalambudde essomero kyokka baagguddewo ekigwo ng'ebibiina ebimu bya bibaawo nga bikutte ne mu mbinabina ekintu kye baagambye nti kiteeka obulamu bw'abayizi mu matigga.

Bano era baasabye Namusoke abawe fayiro y'abasomesa, kyokka ku basomesa 7 abali ku ssomero, 2 bokka be baabadde n'empapula ezibakkiriza okusomesa, ng'abalala baategeezezza nga bwe baakoma mu S.6 nga tebeeyongerayo kusoma.

Abamu ku baana abaasangiddwa mu ssomero eryaggaddwa.

Essomero eddala eryaggaddwa ye St. Balikuddembe Nursery and Primary School Kasanje nga lyasangiddwa nalyo teririna layisinsi ate nga n'ekivundu kye kikwaniriza omuli ne kabuyonjo okuba enkyafu.

Abeebyenjigiriza era baazudde ng'abasomesa 10 abali ku ssomero, abasinga obungi tebaasoma busomesa ng’abamu abaayitiddwa mu ofiisi baategezezza nti baasoma bwayinginiya ate abalala nti basawo.

Jascent Bangi nga ye mukulu w'essomero lino, yalagiddwa okuzza abaana awaka okutuusa ng'ensonga zino zikoleddwako, era ne bamukunya ku lwaki amaze emyaka 16 ng'asomesa kyokka nga layisinsi yeeremye okugifuna.

Essomero lya Shayaan Islamic Junior School e Kasanje, abeebyenjigiriza baasanze ekisulo ky'abawala n'abalenzi biriraaniganye ate nga n'emifaliso abaana kwe basula mikadde nnyo ate nga bajaala wansi ku seminti.

Mu kulambula, abeebyenjigiriza baasanze omusomesa omusajja nga yeebase mu kisulo ky'abawala, era bwe baamukazizza ku lwaki ali mukisulo ky'abawala, yategeezezza nti atera okwebakayo ng'abaana bali mu bibiina basoma.

Ebisulo bino byabadde tebifaananika, nga byabadde bijjudde ebiku era abakulira essomero ne babalagira okuliggala litereeze ensonga eno n’ obutaba na layisinsi, obutaba na kaabuyonjo ziri ku mutindo, n'okuba nti abaana be baggulira abagenyi ggeeti.

Essomero lya Creamland School e Kasanje lyasangiddwa ng'abayizi be beesomesa, nga bwe baababuuzizza abasomesa gye bali ne bategeeza nti bajja lwe baagadde nga ne bwe baba bagenze ku ssomero bamalawo akaseera katono.

Abakulu beeyongeddeyo mu bisulo gye baasanze ng'abalenzi n'abawala basula mu bisenge bye bimu, ate nga ne kaabuyonjo ssaako ebinaabiro bijjudde ekivundu, ssaako essomero obutaba na ofiisi muterekebwa biwandiiko.

Dennis Kabanda akulira okulambula amasomero e Kasanje, yagambye nti bagenda kusigala nga bakola ebikwekweto bino okulaba ng'abayizi basomera mu masomero agalina ebisaanizo ate nga gali ku mutindo.

Ye Philomena Namirembe akulira okulambula amasomero mu Kyengera Town Council yasabye abazadde okutwala abayizi mu masomero ga Gavumenti abayizi baleme kufiirizibwa misomo gyabwe ssaako n'abazadde okubbibwa

.

Diana Nansubuga nga mulambuzi w'amasomero mu Kajjansi Town Council, yasabye abazadde obutalimbibwa na bu bbasale kuba bungi bwe buvuddeko abayizi okusomera mu mbeera embi ate nga n'abazadde tebafuddeeyo kulaba baana baabwe gye basomera.