Amawulire
Abesimbyewo asabiddwa okwewala obutabanguko
Komisona w'akakiiko k'ebyokulonda mu Central North, Anthony Okello alabudde abesimbyewo okukwatagana n'abebyokwerinda okwewala obutabanguko mu kiseera ky'okulonda, kiyambe akalulu okiggwa mumirembe.
Tolbert ng'annyonnyola
By: Peter Ssaava, Journalist @New Vision
Komisona w'akakiiko k'ebyokulonda mu Central North, Anthony Okello alabudde abesimbyewo okukwatagana n'abebyokwerinda okwewala obutabanguko mu kiseera ky'okulonda, kiyambe akalulu okiggwa mumirembe.
Okello yasinzidde mu nsisinkano n'abamu ku b'ebyokwerinda, abakulira eby'okulonda ssaako abakulembeze wamu naabo abesimbyewo eyatudde mu bimuli bya Lutikko ya Kasana Luweero.
Ensisinkano eno yagendereddwamu okukuba tooci mu kulonda kwa bonna okw'akaggwa ssaako n'okutema empenda okulaba ng'okulonda kwaba ssentebe ssaako obukiiko bw'abakyala biggwera mumirembe.
"Wadde waliwo ebyalo ebirina abesimbyewo abangi, tusaba muleme kutekawo butabanguko, wabula mukubirize abalonzi bammwe okukuuma emirembe ate mweyambise ab'ebyokwerinda wekisaanidde babalambike." Okello bweyayongeddeko
Ab'ebyokerinda nga bali mu nsisinkano n'abakulira eby'okulonda
Yategeezezza nti abewandisizza bokka mu lukalala lw'ekyalo bebagenda okukkirizibwa okulonda, ng'abo abesigulidde ku lukalala lw'okulonda kwabonna akakiiko tekagenda kubakkiriza kulonda.
Yagambye nti kino kigenda kuyambako okutangira ababadde bareeta emivuyo nga betaba mukulonda nate nga ssi batuuze, olwo okulonda kwonna nekuggwera mubutabanguko.
Ye Akulira eby'okulonda mu Central North, Tolbert Musinguzi yalabudde abesimbyewo kubwa ssentebe okugoberera amateeka kibayambe obutasazibwamu mu lwokaano lw'okuvuganya.
"Nsaba mwewale okugulirira abalonzi, okwogera olulimi olukyamu, okukola konvooyi enene nebirara kuba ebyalo byaffe bitono ate ennaku ezaabawereddwa nsuubira nti zibamala okunoonya akalulu kubyalo." Musinguzi bweyayongeddeko.
Ab'ebyokwerinda nga bali mu musomo
Yayongedde nakkatiriza akakonge akagenda okukozesebwa nti kagenda kuyamba nnyo okulaga obwerufu eri buli mulonzi ssaako n'okukakasa nti tewali yetaba mukulonda nga takkirizibwa.
Rdc wa Luweero, Mariam Nalubega yategezezza nti eby'okwerinda byayongedde okunywezebwa nga tebasuubirayo bagenda kukola ffujjo mukiseera kino ekya kampeyini n'okutuukira ddala ku nnaku z'okulonda.
Nalubega yalabudde abo abeteeseteese okukola eggaali kulunaku lw'okulonda n'ekigendererwa ky'okutabangula emirembe era nti yenna anaagezaako okutabangula okulonda agenda kukwatibwa avunanibwe.
Kaminsona Okello, Tolbert n'omukyala
"Kyetwagala kwekuva mu kalulu ng'abantu bonna balamu, era olw'okuba tewali agenda kubakugira kugenda kulonda, tusaba abalonzi bonna n'ebesimbyewo babeere bakkakkamu ate bagoberere ebyo ebitereddwawo akakiiko n'abebyokwerinda." Nalubega bweyayongeddeko.
Abantu abasoba mu 200 bebetabye mu nsisinkano eno nga baavudde mu disitulikiti 6 ezikola ekitundutundu kya Central North mu kakiiko k'ebyokulonda okuli Luweero, Nakaseke, Nakasongola, Kiboga, Kyankwanzi ne Kayunga.