Eyavuganyaako mu za Miss Uganda awangudde obwa Miss ISBAT ku yunivaasite

Empaka za nnalulungi ne Sserulungi wa yunivaasite ya ISBAT zicamudde abayizi n’abasomesa baabwe olw’engeri abakontanyi gye beesazeemu obwambalo ekicamudde ennyo bannaabwe.

Jerusha Eyawangudde.

Zeetabiddwaamu abakontanyi abasukka mu 10, abawala n’abalenzi okulondako nnalulungi ne sserulungi wa yunivaasite ow’omwaka 2023/2024.

 Zaayindidde ku yunivaasite eno eya ISBAT ku ttabi lyabwe ekkulu ku luguudo lwa Lugogo Bypass ku lwokutaano era omuyimbi Crysto Panda y’omu ku baasanyusizza abayizi.

Abadde Miss Isbat Darlin Namutebi Ng'ayambaza Mr Isbat .

Zaagenze okuggwa nga mwanamuwala  Jerusha Muwanguzi awangudde obwa Miss ISBAT yunivasite, n’addirirwa  Penny Naigaga ne Rebecca Namutebi mu ky’okusatu. Muwanguzi y’omu ku bawala abaavuganya mu mpaka z’obwannalulungi bwa Uganda ezaakaggwa era y’omu ku bawala abataano abaasigalako abaakola obulungi.

Ate Joshua Agaba yawangudde obwa Mr ISBAT n’addirirwa Remegius Ssali Kiggundu ne Michael Akuguzibwe mu kyokusatu.

Eyeetabye Mu Mpaka Ng'ayolesa.

Bano beebazizza bayizi bannaabwe okubawagira n’okubateekamu obwesige ne bategeeza nti, okwetaba mu mpaka zino kibawadde obuvumu okwogera n’okutuusa endowooza zaabwe mu bantu.

Basoose kwolesa misono egy’enjawulo mu nnyambala ennansi, eya ofiisi, ennyambala y’emikolo n’akawungeezi, okuyimba, okutontoma na buli omu okulaga obusobozi bwe.

Ono Yayambadde Ekiteeteeyi Kya Kikooyi.

Okwo kwe baatadde okubuuzibwa ebibuuzo eby’enjawulo ebikwata ku nsi yaabwe Uganda ne ku yunivaasite ya ISBAT nga nabyo byakoze kinene ku buwanguzi bwabwe.

Dr Kumar Pradeep,  ddayirekita w’ebyenjigiriza ku yunivaasite eno yagambye nti,  abayizi bano beetaaga obuvumu okwogera mu bantu, okuyimirira mu bannaabwe nga bakontana mu mpaka zino n’okubaako kye boogera. Yayongeddeko nti era beetaaga okumanya ebintu ebipya ebigenda mu maaso mu nsi yaabwe n’ensi yonna.

Ddayirekita W’ebyenjigiriza Ku Isbat Dr Kumar Pradeep Mu Mpaka Za Miss Isbat.

Dr Paul Giju,  Academic Registrar wa yunivaasite eno yagambye nti, empaka zino zigaziya okulowooza n’okutegeera kwa bavubuka baabwe era zigendereddwa okubazimbamu obuvumu, wadde basoma naye tebeetaaga bya bitabo byokka.

Wabula n’obukodyo bw’obuwanguzi mu bulamu, beetaaga okuweebwa omukisa okuvumbula obusobozi bwabwe n’okubuzimba.

Ddayirekita W’ebyenjigiriza Ku Isbat Dr Kumar Pradeep Mu Mpaka Za Miss Isbat.