Omusajja atabukidde poliisi y’e Nsangi n'agisuulira omulambo gwa mukyala we

Bya Denis Kizito

WABADDEWO katemba atali musasulire ku poliisi y’e Nsangi bwe bagisuulidde omulambo, ng’entambwe evudde ku kusiba bba w’omugenzi ku nsonga z’ettaka.

Bano basasaamarizza ekitundu bwe bazibye oluguudo lw’e Nsangi okumala akaseera era nga poliisi esanze obuzibu okuzza embeera mu nteeko.

Peter Kakwenda, ng’ono ye bba w’omugenzi yeekoze obusolosolo oluvannyuma lw’okulaba omulambo gwa mukyala we.

Ono ayogeredde poliisi y'e Nsangi ebisongovu olw'okumusiba awatali musango n’atuuka n’okufiirwa omukyala abadde olubuto.

Kakwenda ategeezezza nti ku Lwokubiri lwa wiiki ewedde yava awaka ng’afunye omulimu gw’okuzimba e Buddo nti era nga mukyala we engeri gye yali olubuto olw’emyezi 7 yali yeetaaga obuyambi wabula kyababukaako ye ne banne abaali baweereddwa omulimu okukwatibwa poliisi ne babategeeza nga bwe baali basaalimbidde ku ttaka ly’essomero.

Omulambo G'omugenzi Nga Guyingizibwa Munda Mu Poliisi Okuguggya Mu Luguudo E Nsangi.

Ono asabye gavumenti okumuyamba afune obwenkanya nti kuba mukyala bwe yatagedde nti baamusiba ku nsonga ze ttaka kye kyamuviiriddeko okukubwa puleesa n’afa ng’ali lubuto.

Kyokka bino bibadde bikyagenda mu maaso n’abakazi abalala babiri ne bayingirawo n’abaana abato ne beewera nga bw ebagenda okubasuulira poliisi singa tebata basajja baabwe nti kuba ensonga eyabasibya tebagitegeera ate nga be baali babawa obuyambi.

Sande Samuel Kigemuzi, ng’ono ye yawa omuvubuka ono omulimu ategeezezza nti ye ne banne baludde nga bagugulana ne ssomero lya Kings College Budo ku kibanja ekiwezaako yiika 5 ku kyalo Kimbejja nti era ng’ensonga zino zaatuuka dda ne mu kkooti nti era nga zaawaliriza  n’abakulu okuva mu ofiisi ya pulezidenti okuziyingiramu era ne babaddizza ekibanja kino.

Kigemuzi ategeezezza nti ekyennaku nti mukyala w’omuvuka ono yakubiddwa puleesa n’afa n’olubuto oluvannyuma olw’okutegeera nti bba baamusibye kyokka n’asaba gavumenti okuyingira mu nsonga zino  kuba abantu abasoba mu 30 mu kaseera kano bali mu makomera lwa ttaka lino.