Omukazi atutte bba mu kakiiko k'ekyalo n’amulumirizza obukodo,obwenzi n'okwejjuliranga emmere
JAMIRAH NAMAYANJA ow’emyaka 33 yatutte bba Nsubuga Rajab mu kakiiko k’ekyalo ng'amulumiriza ng'obwenzi bw'abulinamu n’ebbaluwa kwossa n’okwejjuliranga emmere omukyala ky'akooye.
Rajab Nsubuga gwe balumiriza obwenzi ne Jamirah Namayanja ng'ayoza kumunye.
By Bukedde Omusunsuzi
Journalists @NewVision
Bya Florence Tumupende
JAMIRAH NAMAYANJA ow’emyaka 33 yatutte bba Nsubuga Rajab mu kakiiko k’ekyalo ng'amulumiriza ng'obwenzi bw'abulinamu n’ebbaluwa kwossa n’okwejjuliranga emmere omukyala ky'akooye.
Namayanja agamba nti olwamunenyezaako okwedda ku mize kwe kumuggyako omwana ow’omwaka ogumu okumala ennaku bbiri nga tayonse.
Bino bibabadde mu Zone ya Katovu Central mu Tawuni kanso y'e Katovu mu disitulikiti ey’e Lwengo.
Namayanja akaabidde mu lukiiko ng'alumiriza bba nga bwasuse okugwanga mu ssefuliya amatumbibudde nga yejjulira emmere awamu n’obwenzi, ekitabudde bba n'amusaba abuulire akakiiko omuntu yenna gweyali amukutte naye.
Namayanja amumenyedde abamu ku bakazi bba baganza omuli ne bannamwandu n'abafumbo era ne yeewuunya ssente zabaawa ng'awaka tabawa yadde 1,000/- olw’okukozesa era n'awera obutadda mu makaage okutuusa ng' amuletedde omwanawe.
Jamirah Namayanja Ne Mukwano Gwe
Nsubuga asambaze ebigambo bya mukyalawe by'agambye nti byabulimba kuba n’engoye omukazi zalina yaazigula.
Ono naye yamulangidde nga bw'asusse okumuleeteranga olukunkumuli lw’abaana bataazaala ng’ate bweyali amuwasa teyamusanga n’abaana.
Nsubuga eky’okukomawo amatumbibudde asesezza akakiiko nga bwabeera ku kamera y’edduuka nga akyajekebejja.
Akola kunsonga z’amaka n’abaana ku kyalo kino, Nakawombe Manda Mapya n'abakulembeze abalala babuuridde abafumbo bano buli omu awe munne ekitiibwa ne basaba n'omusajja okukomya obwenzi .
Oluvannyuma omusajja yeetondedde mukyala we nga bw'atagenda kuddamu emize gyonna era n'atumya n’omwana gye yabadde omukwese.