Disiturikiti eya Ibanda eri ahabuzoora maisho ahabwa kooto.

N’ebya Stephen Nuwagira

IBANDA

Minisiture y’eby’amagara eyoheeriize tiimu y’abahangu kuza omu disiturikiti eya Ibanda kucondooza bwanyima y’okubarukaho kwendwara ya kooto ‘anthrax’.

Okurugiirira aha mukuru omu kurwanisa endwara omu disiturikiti eya Ibanda, Vincent Mugisha- abantu 5 ahari 6 abahiyirweho eshagama kuza kukyeberwa ahari Uganda Virus Research Institute omuri Arua wiiki ehwaire, bashangirwe baine endwara ya kooto.

Mukuru omu kurwanisa endwara omu disiturikiti eya Ibanda, Vincent Mugisha.

“Endwara ya kooto eri omu disiturikiti, N’ahabw’ekyo ninshaba abantu na munonga abatuura ba Keihangara okwegyendesereza kandi barekyeraho kurya enyama y’amatungo agafiire,” Mugisha arikugambaho n’omunyamakuru aha ofiisi za disiturikiti egi eriizooba Orwakashatu ebiro 15/11/2023.

Abantu 7 kuruga omu byaro ekya Rugaaga I and Rugaaga IV omu gomborora eya Keihangara omuri Ibanda South omu disiturikiti eya Ibanda wiiki ehwaire bakaheebwa ebitanda ah’eirwariro erya Uganda Martyrs Ibanda Hospital Kagongo ahabw’okuteekateekwaho kuba baine endwara ya kooto.

Boona bakoreka obubonero bw’endwara ya kooto omuri okuziimba ebicweka bitari bimwe by’omubiri na munonga emikono, ebironda n’omubiri kusya.

Beitu hoona, abarwaire aba baizire basiburwa kuruga omu eirwariro omu wiikendi bwanyima y’okutunga okuragurirwa. 

Mugisha naagira ngu obwa hati abarwaire aba bariyo nibareeburizibwa omu maka gaabo.

#WestUpdates