Omuteezi w’ebikonde, Kalibala afiire.

N’ebya Fred Kisekka

Omuteezi w’ebikonde omu Uganda, Charles Kalibala ahamiibwe kuba afiire bwanyima y’okumara ebiro 4 abuzire, kandi asingire omwana w’ameezi 2.

Abanyabuzaare ba Kalibala 22, orikumanywa munonga nka Bala Geko bamushangire afiire omu kabafu ah’eirwariro erya Mulago.

Solomon Geko, mwine-nyina wa Kalibala agambiire abanyamakuru ngu omugyenzi atwire abuzire kuruga Orwamukaaga ebiro 15/10/2023.

“Eky’obusaasi tufeeriirwe omuteezi w’ebikonde obaire aine entaranta omu eihanga. Murumuna wangye aheereruka kureebwa Orwakataano ebiro 14/10/2023. Kuruga obwo, atwire abuzire. Tutwire nitumuronda kuhisya obu tumushangire omu kabafu ah’eirwariro erya Mulago afiire,” Geko arikuhamya okufa kwa mwine-nyina.

Betty Nakirijja, muk’omugyenzi akyorekire ngu Kalibala amusigiire omwana w’ameezi 2.

“Munywani wangye munonga akabura Orwakataano kandi ntwire nyerarikiriire. Ku mbaire ndyaho natunga esimu kuruga owa mwine-nyina ngu Kalibala afiire. Tinkumanya okundabeho n’okundakuzemu omwana w’ameezi 2. Maziima ninza kugumirwa,” muk’omugyenzi arikushoborora.

Moses Muhangi, Purezidenti w’ekigombe ky’abateezi b’ebikonde ekya Uganda boxing federation naagira ngu bafeeriirwe omuteezi w’ebikonde obaire aine entaranta.

Beitu hoona, naagira ngu engyeri ei Kalibala afiiremu teketegyereziibwe.

N’obu ab’ekigombe ekya Uganda Boxing Federeation barikwegyekyerera okufa kwe ahari butandu y’ahanguuto, abanyabuzaare ba Kalibala nibahakanisa amakuru aga kandi nibateekateeka ngu abaasa kuba aitsirwe abainazi abatakamanyirwe.

Kalibala atwire nazaanira kiraabu ya Lukanga boxing club nk’omuteezi b’ebikonde kuruga 2018.

#WestUpdates