Kobs bagiwangudde mu rugby n'esigala ng'etolotooma

Mu liigi ya Nile Special Rugby League;

Heathen 19-12 Kobs

Impis 26-30 Mongers 30

Rhino 8-6 Rams

Emipiira gya liigi ya rugby eya Nile Special yaggweeredde mu katemba ku Lwomukaaga, Heathens bwe yakyazizza Kobs ku kisaawe kya Kyaddondo wabula omuzannyo ne guggwa ng’abawagizi n’abatendesi ba ttiimu zombi ebifuba byagala kubabuguma.

Beesise ebitoji n’okwegwa mu malaka wadde ng’ate abataasa baabadde bayitirivu ku njuyi zombi okulemesa olutalo wakati wa ttiimu zino ezitalima kambugu. Omupiira guno gwalabiddwa n’omu ku bayima b’omuzannyo gwa rugby Omulangira David Wassajja.

Abazannyi ba Heathens nga beebaza abawagizi ng'omupiira guwedde.

Okuzannya kwakomye nga Kobs eyunze bannyinimu aba Heathens ku bugoba 12-12 nga bwonna yabufunidde mu kusimula peneti. Ng’ebula eddakiiba ssatu, ddiifiri Ronald Wutimba yawadde aba Heathens peneti mu mmita ttaano zokka bafune obubonero busatu bawangulire ku 15-12 wabula abazannyi ba Kobs ne batamatira nnamula ya ddiifiri.

Mu kukaayana kuno, abazannyi kwe beebalamye, kwalese omu ku batendesi ba Kobs, Timothy Mudhola yeesozze ekisaawe okusikayo Michael Wokorach owa Heathens wabula nga teyaguzannye ng’ono yabadde yeekwase mu kutwalira bazannyi mazzi mu kisaawe.

Kino kyanyiizizza abawagizi ba Kobs ne beesogga ekisaawe n’abamu ku bakungu okukkakkanya embeera.

Mudhola era yagezezzaako okulumba ddiifiri Wutimba eyabadde agabidde Heathens obugoba musanvu okubonereza Kobs oluvannyuma lw’enkaayana eyamaze eddakiika kumpi 10 ne guggwa 19-12. Omulangira David Wassajja nga ye yakwasizza omuzannyi w’olunaku ekirabo n’ebbaasa ya 100,000/-.

Obuwanguzi kati butadde Heathens abalina ekikopo ku ntikko ya liigi n’obubonero 57 nga Kobs ezze ku kyakubiri n’obubonero 54. Omutendesi wa Kobs, Brian Makarama yategeezezza nti abaddukanya omuzannyo basaanye okuddamu okwetegereza ebyabaddewo. Kyategeezeddwa nti ennamula y’emizannyo mu liigi ya rugby ezze ebeeramu ebirumira ekivuddeko ttiimu ez’enjawulo okwemulugunya ku baddiifiri.

Wassajja (ku kkono)ng'akwasa omuzannyi w'olunaku engule.

“Tetukkirizibwa kwogera bingi naye bangi bazze beemulugunya ku nnamula,” Makarama bwe yategeezezza.

Mohammed Athio owa Heathens yagambye nti bazze beetegekedde obukodyo bwa Kobs era baagikubye mu mazima. “Twazze twetegese kukozesa lyanyi era abazannyi baffe abanene era babasindise okutuuka ku buwanguzi,” Athio bwe yategeezezza.

Pirates abalingiza ekikopo nabo baalumye n’ogwe’ngulu e Bweyogerere okumegga Hippos ey’e Jinja ku bugoba 27-22. Mongers e Ntebe ne Buffaloes e Kyaddondo ze zaawangulidde ku bugenyi nga zaakubye Impis ne Walukuba 30-26 ne 24-10.