Harmonize ne Spice Diana bafuukudde abadigize mu kivvulu kya Obafest

Bya Ignatius Kamya  

ABAYIMBI bafuukudde abadigize mu kivvulu kya Obafest okukakkana nga babazinnyisiza agabuli kika. 

Ku Ssande ekiro abayimbi okwabadde Spice Diana, Fik Fameica, Mun G, Azawi, Irene Ntale, Omutanzania Harmonize n’abalala bangi baasumuludde endongo kafungulankete ku Jahazi Pier e Munyonyo, olwo abadigize ne batiguka, okukakasa nti amazina bagategeerera ddala bulungi. 

Abayimbi abo buli omu obwedda akikubira mu sitayiro ye  ng’eno bbo abadigize nabo bwe basumulula omuziki nga waliwo n’abamu abalabiddwaako nga baggyeemu essaati ate abalala obwedda bazinira mu bisubi ate abalala baalabiddwa nga basaakanya ng’abayimbi baabwe be baagala bayimba. 

Abadigize Baabadde Ku Jahazi

Bano Banyumiddwa Bya Nsuuso Mu Kivvulu Kya Obafest

Spice Diana yacamudde nnyo abadigize olw’engeri gye yakubyemu omuziki ku layivu ate n'atakoma ku kya kuyimba nnyimba ze zokka kyokka n’akuba n ezabayimbi abalala okwabadde Bobi Wine, Radio and Weasel, Mesach Ssemakula, King Saha n’abalala mu ngeri y’okuzannyisa amaloboozi n'ayongera okukakasa nti kati mu layivu mukka. 

Ekivvulu kino ekyajjumbidwa ennyo kyategekeddwa olw'okwongera okulaga obwa Sseruganda mu mawanga g’obuvanjuba bwa Afirika era nga kiri mu mawanga okuli; Uganda, South Sudan, Kenya ne Tanzania.