Ebya Villa ne Vipers biggweera mu Uganda Cup

Quarter za Stanbic Uganda Cup
Police - Kataka e Kavumba
Vipers - Villa e Kitende
Kaaro Karungi - KCCA e Kyamate
Kitara - BUL e Hoima
EBYA Vipers ne Villa tebinaggwa; akalulu ka Stanbic Uganda Cup kazzeemu okubasisinkanya omulundi ogwokusatu sizoni eno.
Kaakwatiddwa ggulo ku kitebe kya kkampuni ya Plascon Uganda abateeka ssente mu mpaka zino nga Vipers y’egenda okukyaza e Kitende wakati wa April 18 ne 22 ku quarter.
ENSIIKE ENO KY’ETEGEEZA
Mu liigi ya babinywera sizoni eno, buli omu yawangulira ewuwe. Villa (1-0) e Wankulukuku ne Vipers (2-1) e Kitende. Guno gwe gugenda okusalawo ani musajja sizoni eno.
Villa eyagala kulemesa Vipers okuwangula ebikopo 2 ‘bwassaalongo’. Vipers y’ekulembedde liigi ya babinywera ng’erina essuubi ly’okugiwangula ate erwanira ne Uganda Cup.
Villa erwana butaviirayo awo; Bakyampiyoni ba liigi y’eggwanga aba Villa baagala kuwangula Vipers basigaze omukisa oguwangulayo ku kikopo sizoni eno.
Vipers ekyaliko obusungu bwa Villa okugikubira e Wankulukuku mu gw’okudding’ana mu liigi. Vipers yabadde tennakubwa mupiira bukya ekakasa John Luyinda ‘Ayala’. ku butendesi obujjuvu.
Patrick Kakande yayase nga bawangula Vipers e Wankulukuku sso nga ne Allan Okello yayaka nnyo nga bakuba Villa e Kitende. Bombi ani agenda okubikka munne?
Vipers nkambwe awaka; Bukya sizoni eno etandika, Vipers ye yokka etennakubirwako mu maka gaayo e Kitende. Villa eyagala kuggyawo likodi eno ng’egimegga mu Uganda Cup