St Mary’s Kitende yeesozze semi Final mu mpaka za CAF ez'amasomero

Egyazanyiddwa mu kibinja ekisooka.

Zimbabwe 1-1 Uganda

Morrocco 6-1 DRC

DRC         0-6 Uganda 

Zimbabwe 1-1 DRC

Uganda 3-0 Morocco

 Semi Final enkya

Benin ne Uganda, ssaawa 7

Morocco ne Senegal, ssaawa 10

Abakiise ba Uganda mu mpaka z'amassomero eza CAF aba St Mary’s Kitende beesozze oluzannya oluddirira olw'akamalirizo oluvannyuma lw'okukulembera ekibinja ekisooka mu mizannyo egiyindira mu kibuga Harare ekya Zimbabwe.

Kitende yagguddewo n'amaliri aga goolo 1-1 nabategesi aba Zimbabwe mu muzannyo mwebaasubiddwa emikisa enjolo. Zimbabwe yeyasooke okulengera akatimba nga ekitundu ekyokubiri kyakaddamu nga eyita mu muteebi Moses Moremude. Wabula nga waakayita edakiika ssatu zokka omuwuwutanyi wa Kitende Bashir Endema yabafunidde golo eyekyenkanyi neguggwa goolo 1-1.

St Mary's kitende

Kitende yakomyewo mu muzannyo ogwokubiri mweyakubidde baliraanwa baffe aba DRC goolo 6-0. Kapiteeni wa tiimu Owen Mukisa yeyasoose okuteeba eyomwenda ate  Musa Kironde nabongera mu dakiika eye 12. Mukisa yateebye goolo eyokusatu negukyuka nga kitende ekulembedde goolo 3-0. Mu kitundu ekyokubiri omuwuwutanyi Ivan Kakinda ne Emanuel Opio bayongedde okunywesa ate Mukisa nateeba goolo ye eyokusatu nga gunaatera okuggwa.

Kitende yakomyewo namaanyi mu mupiira ogwasembyeyo mu kibinja bweyatuuzizza akazito ku Morocco okukakkana nga ebatimpudde 3-0. Ku zino  Lucky Wanyama yateebyeko bbiri ate eyokusatu neteebwa Owen Mukisa naweza goolo nnya mu mipiira esatu.

Obuwanguzi buno bwatadde Kitende mu kifo ekisooka ku bubonero musanvu Morocco nekwata ekifo kyakubiri nobubonero mukaaga ate omutegesi Zimbabwe ne DRC nebawanduka.

St Mary's Kitende

Uganda kati etunuulidde kumalawo kikwa ekyobuteesogga luzannya olwakamalirizo nga yaakuzannya Benin ku semifinal. Benin okutuuka wano yakutte ekifo kyakubiri mu kibinja ekyokubiri. Mu luzannya olulala Morocco egenda kwambalahana ne Senegal eyakulembedde ekibinja ekyokubiri.

Omutendesi wa Kitende Hassan ZUNGU alina obwesige nti ku mulundi guno Kitende yaakusukka oluzannya oluddirira olwakamalirizo singa abavubuka be bazanyira ku biragiro bye.