KCCA EWANZE GGIYA

KCCA FC ekomezzaawo essuubi ly’ekikopo kya liigi mu bawagizi baayo bw’erumbye Ntugasaze e Kamwokya n’egikuba ggoolo 2-0.
Wiini eno, eyookusatu ey’omuddirihhanwa, yasembezza KCCA mu kifo kyokutaano ku bubonero 10 nga BUL, ekulembedde erina 13.
Kapiteeni wa ttiimu KCCA, Herbert Achayi ye yagguddewo okuteeba mu ddakiika ya 36 bwe yasimudde ekisobyo omupiira ne gukuba ku mikono gya ggoolokipa wa Ntugasaze, Tonny Atugonza ne guyingira akatimba.
Ng’ekitundu ekyokubiri kyakaddamu, omutendesi wa KCCA, Brian Ssenyondo yaleese Charles Lwanga ne Trevor Mubiru mu kya Ibrahim Kasule ne Ismail Fahad, abaayongedde okussa Ntugasaze ku kisenge.
Oluvannyuma Ivan Ahimbisibwe ne Said Mayanja nabo baasikiddwa Emmanuel Anyama ne Yunus Sibira okwongera okunoonya ggoolo. Anyama yamaze eddakiika 3 zokka n’ateeba eyakutudde Ntugasaze ppata.
KCCA yasooka kukubwa NEC ne Expess (buli emu 2-0) n’ezzaako okulemagana ne Kigezi HomeBoyz (0-0) nga tennawangula Kataka ne URA (zombi 1-0). KCCA ekomawo mu nsiike nga October 22 ng’ekyaza UPDF e Lugogo.
VILLA ERUMBYE POLICE
Villa, eyafiiriddwa ‘Maama Sanyu’ Rukia Kasoga, erina omukisa okulinnya ku ntikko ya liigi bw’ekuba Police olwaleero e Kamwokya. Villa y’emu ku ttiimu 3 ezitannakubwamu ng’obuwanguzi bwakugitwala ku bubonero 14 okubuuka BUL, eyalemaganye ne Lugazi eggulo