Muteiha amatungo omuri za disiturikiti ezirimu endwara yeejwa- Minisita Rwamirama.

N’ebya Beth Akatukunda

Minisita w’eihanga ow’eby’amatungo, Lt. Col. Bright Rwamirama nahabura abariisa omu eihanga abaheerize kusirika amatungo gaabo obutakwatwa endwara yeejwa eya Foot and Mouth Disease okugaruka kugyema amatungo gaabo bwanyima y’ameezi 6.

Minisita nakyoreka ngu gavumenti eheerize kugaba emibazi ya busha omuri za disiturikiti ezirimu endwara yeejwa kwenda ngu abariisa babaase kugyema amatungo gaabo obutakwatwa endwara yeejwa. 

Rwamirama nayongyeraho ngu omubazi gwine amaani kandi nigumara omu matungo ameezi 6.

Nabwo narabura abanya-Uganda okwerinda okutambuza n’okwiha amatungo omuri za disiturikiti ezirimu endwara yeejwa arikugira ngu eki nikibaasa kureetera endwara egi yajanjaara ekahika omu bicweka ebindi by’eihanga.

Minisita Rwamirama nabwo ori omuny’ishengyero wa Isingiro North nashaba abeebembezi b’omuri za disiturikiti ezirimu endwara yeejwa okukuratira ebiragiro ebiteirweho gavumenti kurwanisa endwara egi. 

Za disiturikiti ezaahamiibwe kuba zirimu endwara yeejwa n’eya Gomba, Lyantonde hamwe n’ebicweka ebimwe ebya Kiruhura okurugiirira ahari Rwamirama.

#WestUpdates