Abarikukoresa kubi eza PDM barabwirwe- Minisita Anyakun.

N’ebya Bruno Mugizi

BUSHENYI

Minisita w’eihanga ow'ebigwererezi, Esther Anyakun aharahiire kwija kukwata abantu boona abarashangwe barikukoresa kubi esente za puroguraamu ya Parish Development Model omu disiturikiti eya Bushenyi. 

Minisita w’eihanga ow'ebigwererezi, Esther Anyakun n'abeebembezi ba Bushenyi barikurambura abantu abaganyirwe omu kitongore ekya Give Directly omuri Bushenyi. PHOTO: Bruno Mugizi.

Anyakun, ebi abigambire eizooba rya nyomwebazyo obu abaire narambura abantu ab’omu muruka gwa Swazi na Kakoni omu tauni kanso ya Kyamuhunga omuri Bushenyi abarikuganyirwa omu kitongore ekitari ekya gavumenti ekya 'Give Directly' ekirikuhwera abantu kuruga omu bworo barikubaheereza esente.

Minisita w’eihanga ow'ebigwererezi, Esther Anyakun arikurambura abantu abaganyirwe omu kitongore ekya Give Directly omuri Bushenyi. PHOTO: Bruno Mugizi.

Amaka garikurenga 1,000 kuruga omu miruka 2 egi nibo babaasize kuganyirwa omu nteekateeka egi obwo buri ka erikutunga shiringi 3,650,000.

Anyakun agizire ngu abarikuganyirwa omu nkora ya PDM hamwe n’abeebembezi ba za SACCO batandikire kukoresa kubi esente ezi nikwo kuragiira ngu bakwatwe.

Minisita w’eihanga ow'ebigwererezi, Esther Anyakun arikurambura abantu abaganyirwe omu kitongore ekya Give Directly omuri Bushenyi. PHOTO: Bruno Mugizi.

Lucy Alubho, Omushuganisa w'ekitongore kya Give Directly na gavumenti agizire ngu nk'ekitongore, nibahwera abantu kurabira aha akaunti za banka zaabo eki arikugira ngu eki kibahweriire kutunga esente zitibirwe.

Jaffari Bassajjabalaba, Ceeyamaani wa disiturikiti ya Bushenyi asiimiire ekitongore eki ahabw’okureetaho entunguuka omu byaro beitu abashabire kwetorora disiturikiti yoona.

Ceeyamaani wa Bushenyi, Jaffer Bassajabalaba n'abandi barikurambura abantu abaganyirwe omu kitongore ekya Give Directly omuri Bushenyi. PHOTO: Bruno Mugizi.

Robert Atuhairwe, RDC wa Bushenyi araganiise ngu nibaija kuzoora amaisho kureebuka ngu abahairwe sente ezi bazikoresa kurungi kubaasa kubeiha omu bworo.

#WestUpdates