Owabaireho Purezidenti wa South Africa, Zuma kugaruka omu karuuru.

N’ebya Omushaki weitu

JOHANNESBURG, SOUTH AFRICA

Owabaireho Purezidenti wa South Africa, Jacob Zuma agarukire kandi naija kwesimba omu karuuru akarikuza kuteerwa omu kwezi kwa 5, 2024 arikwesimba aha kyabaire kiri ekigombe kye ekiri omu bwebembezi ekya African National Congress (ANC).

Zuma, owabaire Purezidenti wa kana w’eihanga erya South Africa ahagati ya 2009 na 2018 akagyemeserezibwa kuruga omu ofiisi ahabw’okugambwa kuba yayejumbiire omu kurya enguzi.

Ogu akiriyo najunaanwa emishango eine akakwate n’obushomankuzi.

Omu mwaka gwa 2021, Zuma akakomwaho ahabw’okujemera kooti bwanyima y’okwanga kwija omu kooti aha mushango gw’obushomankuzi.

Kooti ekacwera Zuma kukomwa ameezi 15 omu kihome beitu akamara omu kihome ameezi 2 gonka.

Omu meezi agahingwire, Zuma aizire naasinga emishango ya kooti ahi gavumenti ebaire neyenda kuremesa ekigombe kye ekisya ekya uMkhonto we Sizwe (MK) kwetaba omu karuuru akarikuza kuteerwa ebiro 29/05/2024. 

Zuma, 82, akarangiirira omu kwezi kwa 12 ku arikwija kurondera akaruuru ekigombe ekisya ekya uMkhonto we Sizwe (MK).

Abantu b’omuri South Africa nibeija kuteera akaruuru k’okutoorana abany’ishengyero ahabiro 29/05/2024 akaruuru akarikureebwa nk’ak’amaani kuruga enkora ya demokuraciya etebwaho kuhendera obutegyeki bwangamba nyenka.

Abany’ishengyero abatooranwe nibo barikwija kuteera akaruuru k’okutoorana Purezidenti.

#WestUpdates