Akaruuru ka Boda Boda, Mbarara, Asanasio yatunga 19 bwonka!

N’ebya Eli Akiza

Eizooba eri abavugi ba Boda-Boda omu rurembo rwa Mbarara baatoorana abeebembezi abasya abaraabeebembere.

Sadius Owokunda niwe yaatooranwa hamwe n’abandi 8 okutwara omwoga gw’okwebembera abavugi ba Boda Boda omu rurembo rwa Mbarara.

Akasheeshe k’eriizooba bwaba buri obutandibata obwo ekikunga-musisa ky’abavugi ba Boda Boda baayeshuka omu kishaayi Kakyeka okutoorana abeebembezi baabo bwanyima y’okumara akaire karaingwa bataine bwebembezi.

Enkuyanja y'aba Boda Boda b'orurembo rwa Mbarara bari ahakishaayi Kakyeka omukaruuru k'okutoorana abeebembezi baabo. PHOTO: Eli Akiza.

Aha bantu 9 etebe ibiri; eya ‘chairperson’ hamwe n’ow’eby’obuyonjo nizo zaaba nizihakanirwa kandi abandi barabireho bataine kihakanisa.

Abeetsimbire baabanza n’okugambaho n’abahagizi baabo ebi barikwenda kubakorera ahagati y’akaari k’abahagizi hamwe n’amashemererwa.

Na bwanyima aba baateera akaruuru kaabo akaaba kari ak’omugongo.

Abashagiki ba Sadius Owokunda bamuri omumugongo ahakuteera akaruuru k'okutoorana abeebembezi baabo omururembo Mbarara. PHOTO: Eli Akiza

Sadius Owokunda niwe yaarabaho kuba ‘chairman’ bwanyima y’okwihayo oburuuru 849 kandi mugyenzi we Asanasio Kiwanuka akatunga 19 bwonka. Bwanyima y’obu haatooranwa abarakurire eby’obuyonjo ahi Mujurizi Herbert yareeguura mugyenzi we Akatwijuka Aggrey n’oburuuru 596 ahari 402.

Asanasio, owatunga oburuuru 19 ahari 868, ari omukusherura akaruuru ahakishaayi Kakyeka. PHOTO: Eli Akiza

Allan Buhanda Karakure ori ‘Commercial Officer’ wa Mbarara City kandi otwire ayebembeire ehururu egi yasiima aba Boda Boda ahabw’okugira obusingye hamwe n’okucwamu okuronda abeebembezi baabo omu mazima.

Owokunda Sadius niwe yatooranwa nka ‘Chairman’, Byaruhanga Christopher nk’omuhwezi we, Mayanja Robert nk’omubiiki, Muhwezi James nk’omuhandiiki, Nuwamanya Samuel ow’eby’amakuru, Lubega Badru nk’ow’eby’okwerinda, Nkuba Joseph, eby’emizaano kandi Ngabirano Guardson ow’eby’obwegyese.

#WestUpdates