Giigino emisomo egigenda okubeera mu 'Harvest Money'

Eno ye nsonga lwaki kkampuni ya Vision Group, ng’eyita mu musomo gwa Harvest Money gw’etegeka buli mwaka okutuusa amagezi g’enjawulo eri abalimi n’abalunzi okubamyisa kye bateekeddwa okukola n’enzirukanya ya bizinensi entuufu okufunamu ekisinga.

Emisomo mu Harvest Money nga bwe ginaatambula ku nnaku ez’enjawulo omwezi ogujja.

Ku Lwokutaano, March 18

Emmwaanyi: Omusomo guno gugenda kusomesebwamu Edward Lutaakomo owa UCDA, Joseph Nkandu ne Gerald Katabazi, Okulunda embizzi: Abalunzi bagenda kusomesebwa Dr. Emma Naluyima (Maama Pig) ne Dr. Joseph Kizito. Bano bombi basawo ba bisolo era balunzi ba mbizzi. 

Omusomo gwa Harvest Money gukomyewo wabweru.

Okulunda eby’ennyanja: Bino byakusomesebwa Vincent Ssebutemba n’ekitongole kya NARO nga nabo essira lya kussibwa ku kugattako omutindo. 

Okulunda embuzi; Grace Bwogi omulunzi w’embuzi e Rakai ne Dr. Benda Katali be bagenda okusomesa mu musomo guno.

Okulima obutunda: Mashir Mayiga omuwanguzi w’empaka z’omulimi asinga era akutte engule y’okulima obutunda mu Uganda yagenda okukulemberamu omusomo guno ng’ali wamu ne Joseph Kuggundu. 

Okulunda enkoko: Ssaalongo Robert Sserwanga ne Chris Magezi omukugu mu ndiisa y’enkoko okuva mu kkampuni ya Champrisa International ne Dr. Samuel Ssewagudde omusawo w’ensolo. 

Eriyo n'omusomo gw'okulunda enkoko.

Amatooke: Ssaalongo Washington Mugerwa n’abakugu okuva mu kitongole kya NARO be bagenda okusomesa okulima ebitooke. 

Okulimira awafunda: Pulofeesa Diana Nambatya Nsubuga omuwanguzi w’empaka z’omulimi asinga y’agenda okukulemberamu omusomo guno ng’ali wamu ne Harriet Nakabaale.

Ku Lwomukaaga, March 19: 

Okulunda enjuki: Steven Kunihira (Mr Bee) n’omukugu okuva mu NARO be bagenda okusomesa obukulu bw’okulunda enjuki.

Obumyu: Dr. Arthur Tumwine ne Beatrice Luzobe be bagenda okusomesa okulunda obumyu nga bizinensi ezikutte akati ensangi zino.

Omusomo gw’okulima amatooke nagwo gwakuddibwamu nga ku lunaku luno essira lya kussibwa ku kugatta omutindo ku matooke. 

Okulima obutiko: Abel Kiddu omulimi w’obutiko yagenda okusomesa okulima obutiko n’okubukolamu wayini.

Okulima enva endiirwa: Waakubeerawo okulima enva endiirwa n’okulimira mu biyumba nga guno gwa kusomesebwamu Joseph Male .

Okulima enva endiirwa.

Ku Ssande, March 20: Okugatta omutindo ku mata Betty Mbazira. Era omusomo gw’okulunda enkoko gwakuddibwamu nga gusomesebwamu Ssaalongo Robert Sserwanga, Chris Magezi and Dr Samuel Sssewagudde n’okw’okulima emmwaanyi okw’okuddibwamu.

Emisomo emirala kugenda kubeerako ogw’okugatta mutindo ku bibala, okukola amanda mu kasasiro omuli obusa ne kalimbwe, era n’omusomo gw’okulunda embizzi gwa kuddibwamu Dr. Emma Naluyima ne Dr. Joseph Kizito baddemu okukubwangula ku ky’olina okukola okufuna mu ffaamu yo.

Omwoleso guno gutegekeddwa okubeerawo okutandika ku Lwokutaano nga March 18 okutuuka ku Ssande nga March 20 ku kisaawe e Kololo era ng’ayagala okuyingira mu mwoleso asasula 10,000/- ate okuyingira mu misomo nayo osasula 10,000/- olunaku.

Emisomo gyonna gigenda kutambulira ku mulamwa gw’okwongera omutindo ku bikungulwa ng’ekkubo ly’okugaziya akatale n’ennyingiza y’abalimi n’abalunzi okubufuula bizinensi.