Omulimi by'osaanye okukola okwetegekera ekyeya

ENKYUKAKYUKA mu mbeera y’obudde mu ggwanga ereetedde abalimi bangi okusoberwa olw’ekyeya okubalumbanga entakera ne kireka ng’ebirime byabwe bikaze ate n’ebisolo ebimu bifudde olw’okubulwa omuddo n’amazzi.

Sizoni eno, abalimi okuva mu disitulikiti okuli Kassanda, Mubende, Lwengo, Kalungu n’endala ekyeya kyabakosa dda ng’ebirime byabwe bikaze.

Kyokka abalimi n’abalunzi balina okwetegeka kuba minisitule y’amazzi n’obutonde bw’ensi yalabudde nti, okutandika n’omwezi gwa June okutuuka mu September nga gutandika, ebitundu by’eggwanga eby’enjawulo bigenda kubaamu ekyeya eky’amaanyi.

Paulson Mutekanga, omulimi e Kasaana, Kasambya mu Mubende agamba yafiiriddwa yiika za kasooli ttaano eyakaze nga tannaleeta luyange olw’obutafuna nkuba, n’asaba Gavumenti ebayambe ku byuma ebifukirira.

BWE WEETEGEKA
Azariah Kaggwa, omulimisa w’e Kammengo mu Mpigi agamba nti:

l Omulimi w’ebirime ebiwangaazi ng’emmwaanyi, ebitooke, n’ebirala okubikka kikulu okukuumira amazzi mu ttaka n’obutafuumuuka okumala ekiseera ekiwerako
.
Kozesa ebisoolisooli bw’oba obifunye, tema obugegere mu nnimiro wakati w’emmwaanyi oba ebitooke, oteekemu obusa era obuziike. Obugimu bwe bunaaleeta mu ttaka bujja kuyambako mu kuliisa ebirime byo mu musana.

l Wettanire enkola ey’okufukirira, mu busobozi bwonna bw’olina. Ate abalimi b’ebirime ng’ennyaanya oba emboga, singa wettanira okufukirira okungula weeramula. Bw’oba wasima ensalosalo mu nnimiro ogenda kuyambibwa kubanga zikekkereza amazzi ebirime byo ne bitakosebwa nnyo kyeya.