Omumerika nnannyingi Arsenal agaanyi okugitunda

Kiddiridde omugagga ono okuwandiisa Arsenal mu European Super League ekintu ekyanyiiza abawagizi ne batandika kampeyini y’okumugoba mu ttiimu.

Wabula Omumerika Kroenke ow’emyaka 73 agambye nti tajja kutunda wadde omugabo ogumu oba omuguzi ne bw’anajja ne ssente mmeka ng’ayagala okugigula.

Omugagga Daniel Ek, nga yeegattiddwaako abaali bassita ba Arsenal; Thierry Henry, Deni Bergkamp, Patrick Vieira n’abalala beegasse ku Ek era baamusuubizza okumuyamba mu buli kimu basobole okugoba mu ttiimu.

Kigambibwa nti Ek yataddewo obuwumbi bwa pawundi bubiri n’ekitundu okugula Arsenal.

Ek si ye yekka ayagala okugula Arsenal waliwo n’Omufrika Aliko Dangote enzaalwa y’e Nigeria naye amaze ebbanga nga yeepikira okugula ttiimu eno.

2016 Arsenal V Liverpool Holding

Dangote ayogerwako ng’Omufrika asinga obugagga ku ssemazinga ono era yasuubiza nti okugiyiwamu ssente zonna ze yeetaaga egule abazannyi abalungi.

Bibadde bikyali bityo, n’eyali omutendesi wa Arsenal, Arsene Wenger n’asuubiza okuyamba ku baali bassita ba Arsenal okulaba nga ttiimu egenda mu maaso.

Kino kyongedde okuwa abaagala okugigula amaanyi.

Abawagizi ba Arsenal baagala Kroenke abaviire mu Arsenal nga bamulumiriza okukonya ttiimu n’eremwa okuvuganya ne ttiimu endala ennene mu Bulaaya.

Sizoni eno, Arsenal eri mu kya 10 mu Premier era ekisinga okuluma abawagizi kya kuba nti eyinza okulemwa okukiika mu mpaka za Bulaaya zonna singa eneeremwa okuwangula ekikopo kya Europa.