Azawi akubye abawagizi be omuziki okubakulisa omuggalo

Olwo buli yabadde eyeesisigiriza wansi n’asituka azine okusobola okwenaazaako situleesi y’omuggalo mwe bamaze emyaka 2.

Abadigize ng'omuziki gubayingidde

Bino byabadde mu bbaala ya Legends e Naguru  mu Kampala awabadde wategekeddwa akabaga aba Uganda Breweries limited nga batongoza omwenge gwabwe omupya  ku katale Tusker Cider.

Guno gwatongozeddwa minisita omubeezi ow’eby’ensimbi Henry Musasizi eyasiimye ekitongole kino olw’okubeera abayiiya ennyo n’okuwa Bannayuganda emirimu.

Ebyana byayambalidde akabaga kano nga biringa ebyekulisa omuggalo, anti nga biraga emibiri. Bakira obwedda bituuka bwe byekubisa ebifaananyi by’okuteeka ku mikutu  emigattabantu.  Ngera obwedda bizinira mu bukukulu nga bwebirinda abayimbi. 

Azawi ng'akuba abawagizi be omuziki

Azawi yalinnye ku siteegi ssaawa 4:00 ez’ekiro ebyana ne biraluka ne bizina amazina agasiibula omuggalo ne byesogga siteegi okuyimba naye. Bakanyama baagezezzaako okugoba abantu ku siteegi nga tebakkiriza okutuusa Azawi bwe yalagidde baleke abawagazi be beemale egoga.