"Amooti, ekituufu by’oyogera bitusanyusizza naye naffe ‘ekonome’ etunyiga, genda weeyiiyize awalala"

“Kazannyirizi Amooti Omubalanguzi ye yabadde kalabaalaba mu kivvulu ekyatuumiddwa ‘Tugende mu kikadde’ ekyabadde ku Serena Hotel ku wiikendi.

Nga bulijjo, yakoze obubadi bwe obwacamudde abantu era bwe yalengedde abanene nga bafa enseko n’ava ku siteegi n’agenda ng’abayitamu.

Amooti ng'ali ne minisita Kyambadde ssaako Sam Bagenda owa Ebonies.

Ako kakodyo k’aba MC n’abayimbi okunoonya ssente mu bivvulu. Kyokka wadde abadigize baasasudde buwanana okuyingira, (150,000/-) ez’okufuuwa abayimbi ne MC zirabika tezaabaddemu nga balinga nabo abeekwasa ‘Economy’ soma ‘ekonome’ okubanyiga.

Era musajjawattu Amooti yakanze kwererejjera mu maaso g’eyali Minisita Ameria Kyambadde ne Dr. Bbosa owa Ebonies nga kwatadde n’okubawaana kyokka nga tebavaayo gye bali.

Owoolugambo waffe atugambye nti wadde abategesi b’ekivvulu baayodde, abamu ku bayimbi baawuliddwa nga beeyogeza nti ekivvulu kyabasaze ndowooza olw’abadigize obutabafuuwa. Oba tebaategedde nti kino ekivvulu ky’abakungu? Nze naawe.

Era n’abamu ku badigize nti nabo ezo ssente ze baabasabye beekudde nneekuule bawummuze ku birowoozo n’okwemalako situleesi nga tebasobola kwongerako z’akufuuwa bayimbi ne MC.

Abamu ku bayimbi abaasanyusizza abantu abantu kwabaddeko: Chane Nalubega, Kabuye Ssemboga, Lady Mariam Tinatine, Abdul Mulaasi, Ziggy Dee, Betty Mpologoma ne Eddy Yawe.