Aba Ghetto Kids kati amazina bagabiibiza ba lulyo Lulangira e Bungereza!

Bamusaayi muto aba Triplets Ghetto Kids ndowooza essaala ze basaba eri Mukama Katonda zidduka misinde gya kizungirizi okumutuukako oba si ekyo,nga kayaayaana gwe baabanaza yonoga mu kyogero!

Nnaabakyala Camilla Ng'abuuza Ku Omu Ku Baana Bano.

Abaana bano, ku Mmande nga 11, March 2024 baalinnye ebbaati ne boolekera ekibuga London ekya Bungereza gye baagenze okusanyusa abantu ku mukolo ogw’okukuza olunaku lw’obuweereza bw’Obwakabaka bwa Bungereza mu mawanga agaaliko amatwale gaayo, ku WestMinster Abbey mu London olw’omulundi ogwa 75.

Vidiyo y'amazina aba Ghetto Kids ge baazinye ku WestMinster Abbey ku Mmande. (Vidiyo evudde ku mukutu gwabwe ogwa Youtube.)

Nnaabakyala Camilla n’Omulangira William be bamu ku baabadde ku mukolo guno era ku mulundi guno, baabasanyusizza na mazina ga kinnansi ng’eno eng’oma bwe zisindogoma, abagenyi abaabaddeyo ne basigala kubanyeenyeza mitwe nga embuzi etenda enkuba!

Omulangira William Ng'abuuza Omu Ku Baana Abali Mu Kibiina Kino.

Olunaku lw’amawanga agaafugibwako Bungereza lukuzibwa buli Mmande eyookubiri mu mwezi Ogwokusatu (March) era ebijaguzo bino ebyatandika ku Mmande ya wiiki eno bikulungudde ssabbiiti nnamba nga bigenda mu maaso.

Amawanga 56 agaafugibwako Bungereza gaasindise abakiise okujaguliza wamu n’Obwakabaka ku kitebe ekimanyiddwa nga Commonwealth secretariat Headquarters, mu kibuga London.

Owa Ghetto Kids Ng'abiibya Amazina.

Gye buvuddeko, abaana bano baatutumuka nnyo ku ssemazinga wa Afirika ne Bulaaya okutwaliza awamu oluvannyuma lw’okwetaba mu mpaka z’okwolesa ebitone ku siteegi ekyasinze obunene n’obumanyifu mu nsi yonna, eya Britain’s Got Talent, gye baazinira amazina ne bamalira mu kifo ekyomukaaga.

Amazina gaabwe gaasensera abalabi n’abasazi b’empaka era okuva kw’olwo tebaddanga mabega.

Wano Nga Bali Ku Stamford Bridge, Ekisaawe Kya Ttiimu Y'omupiira Eya Chelsea.

Waliwo n’akatambi akalala akasaasaanidde ku Tiktok ku akaawunti ya kkiraabu y’omupiira eya Chelsea nga kalaga Ghetto Kids nga bazinira mu kisaawe kyayo ekya Stamford Bridge nga bwe baleekanira waggulu, ekivuddeko Bannayuganda abamu abaakajanja okweyogeza mbu kati bawulira baagala kusala ddiiro bawagire Chelsea!

Vidiyo eyabadde ku Tiktok aba Chelsea gye baatadde ku akawunti yaabwe eya Tiktok ng'erimu aba Ghetto Kids bwe baabadde bazina mu kisaawe kya Stamford Bridge, e Bungereza.