Kenzo atabukidde abatiitiibya abayimbi b'ebweru

EBY’OKUTAMBULIZA omuyimbi Omutanzania Diamond Platinumz mu nnyonyi ng’agenda okuyimba e Ntungamo, bitabudde Eddy Kenzo, pulezidenti w’ekibiina ekigatta abayimbi akya UMNF.

Ekivvulu ekyabadde e Ntungamo, baakitegese okutumbula okulima emmwaanyi era Kenzo naye yakiyimbiddeko.

Diamonda Bw'afaanana.

Wabula munyiivu nti abategesi baataddewo embeera egezaako okunafuya abayimbi ba wano, ekitaabasanyudde.

Diamond Platinumz ye yakulembeddemu abayimbi ku kivvulu okwabadde ne The Ben okuva e Rwanda n’abaawano okuli; Bebe Cool, Kenzo, Ray G n’abalala.

Kenzo agamba nti yeewuunya, abategesi okupangisiza Diamond ennyonyi eyamutuusizza ku kisaawe e Ntebe kyokka ne batakoma awo ne bamuwa ne namunkanga eyamututte e Ntungamo ng’ali ne The Ben so nga bbo abayimbi baawano, baabawadde ssente z’amafuta newankubadde ng’olugendo baabadde bagenda ku lwe lumu.

Ayongerako nti talina buzibu na Diamond Platinumz era eky’okuyisa obulungi abagenyi nakyo akimanyi kirungi naye nti ekyabaddewo ku Diamond, baakisussizza ate ne kijolonga n’okulumya abayimbi b’e Uganda abaabadde ku mukolo ogwo.

Kenzo agamba kyabeewuunyisizza, Diamond bwe yatuuse e Ntungamo ng’akozesa ennyonyi kyokka n’abeerawo akaseera katono ne bamuzza e Kampala ate enkeera ne bamuzzaayo era ayimbe.

Ayongerako nti embeera eno yali yabagibwa dda, kuba abategesi b’ekivvulu kino baali bakikoze nga Diamond y’alina okuyimba yekka kyokka olw’omuliro Bannayuganda gwe baabateekako nga bayita ku mutimbagano, baagonda ne bagattako abayimbi baakuno.

Ekirala ekyasinze okuluma Kenzo, ze ssente obukadde 750 obwaweereddwa Diamond Platunumz okuyimba.

Agamba nti bw’ozigeraageranya n’ezo ze bawa abayimbi ba wano yeewuunya ekigendererwa kyabwe nti kuba bo babawa buswazzi ng’era alowooza embeera eno ye yaleetedde ne Jose Chameleone okugaana okuyimba ku kivvulu ekyo.