Omukuumi akubye munne essasi

Bya Benjamin Ssemwanga  ne Kizito Musoke

ENKOZESA y’emmundu embi mu bakuumaddembe yeeyongedde ok­weyoleka, omukuumi wa kkampuni y’obwannannyini eya Capital Guard Security bw’avudde mu mbeera n’asindirira mukuumi munne amasasi ku mutwe agamuttiddewo ng’amulanga okumumalirawo em­mere gye baafumbye.

Peter Ocholai ye yavudde mu mbeera n’akuba John Mujumbi amasasi ku mutwe n’afiirawo ku Lwomukaaga akawungeezi e Lukuli mu munisipaali y’e Makindye.

Ababiri babadde bapangisa ku nnyumba za Twaha Matovu nga we bava okugenda ku supermarket gye bakuuma eri mu kitundu kye kimu.

Nnannyini nnyumba Matovu ya­gambye nti yasoose kulaba Ocholai ng’anaaba amaaso ate Mujumbi (eyattiddwa) ng’ayoza essowaani kwe yaliiridde n’entamu mwe baabadde bafumbidde emmere.

Yawulidde Ocholai nga yeemulu­gunya ku munne nga bw’asusse okufumba emmere n’agimulyako yonna. Ekyaddiridde kwabadde kuwulira kibwatuka nga baa­genze okusembera oluvannyuma amaaso gaatuukidde ku Mujumbi ng’akubiddwa essasi ku mutwe.

Ocholai yabadde adduse naye ng’emmundu zaabakuumi zombi ziri ku mabbali awo. Abakuumi bombi kyategeezeddwa nti babadde baamukwano ekyabawaliriza n’okupangisa ennyumba emu mwe basula.

Abaserikale Ku Muzigo Omukuumi We Yattidde Munne.

Kasim Ssekimpi, ssentebe wa LC I owa Sankala zooni yategee­zezza nti abakuumi bano babadde bapya mu zooni ye nga tebannaba wadde okweyanjula mu bitabo bye kubamanya.

Poliisi ng’eduumirwa DPC we Kabalagala, Emmanuel Mafundo yakung’aanyizza ebyakozeseddwa byonna mu ttemu n’ategeeza nti batandise okunoonya agambibwa okuba omutemu.

 OMUKUUMI ALUMIZZA  OMUNTU E WANDEGEYA

Poliisi y’e Wandegeya yakutte Milton Apuret omukuumi wa kkampuni y’obwannannyini eya B-Safe Security Company eyakubye essasi eryakutte Geofrey Mwesigwa eyabadde ku bibye ng’atunda dduuka.

Byabaddewo Lwamukaaga akawungeezi ng’obuzibu bwa­vudde mu mmotoka okutomera eddirisa lya Supermarket ya TIPY NICE LTD SUPER MARKET eya­gibaddemu n’ayagala okudduka.

Luke Owoyesigyire amyuka omwogezi wa poliisi mu Kam­pala yagambye nti yakubye essasi bwe yabadde atangira mmo­toka eyakoze akabenje okudduka. Kyokka ebyembi essasi lyasibidde mu dduuka eririraanyeewo ne likuba Mwesigwa eyalibaddemu ng’atunda.

Poliisi we yatuukidde nga  Mwesigwa atwaliddwa mu ddwaaliro gy’afunira obujjanjabi. Kyokka baggyeewo ebizibi okuli emmotoka eyatomedde n’ekisosonkole ky’essasi era ne beekebejja ekituli ekyayiseemu essasi mu luggi lw’edduuka.

Apuret yakwatiddwa n’atwalibwa ku poliisi e Wandegeya ng’okunoonyereza bwe kugenda mu maaso oku­zuula ekituufu ekyabad­dewo.