Gavumenti eyoheeriize amabaati garikurenga 97,000 omuri Karamoja.

N’ebya Ivan Tsebeni 

WAKISO

Gavumenti kurabira omu ofiisi y’enganzi y’eihanga eyoheeriize amabaati garikuhika 97,555 agarikwija kugabirwa abantu b’omu kyanga eki.

Amabaati aga gagyenderiire kugabwa omu disiturikiti 9 ez’omu kyanga eki ezirimu; Kotido, Kaabong, Karenga, Nabilatuk, Abim, Moroto, Napak, Amudat na Nakapiripirit. 

Amabaati agarikuza kuheebwa abantu b'omu kyanga ekya Karamoja agu gavumenti eyoheeriize omu kyanga eki.

Okurugiirira ahanteebekanisa, amabaati aga nigeija kugabirwa abantu 3,752 kandi buri muntu oine kutunga amabaati aga naija kuba naheebwa amabaati 26. Amabaati 20 nag'okushakaaza enju z’okuraramu, amabaati 4 kuteebwa aha kiyungu kandi amabaati 2 n’aga kamina.

Omu mwaka gwa 2021, gavumenti ekahamya embaririra ya shiringi biriyooni 39 kubaasa kugura obuhwezi bw’okuheereza abantu b’omu kyanga ekya Karamoja kubaasa kurwanisa obworo n’okugira entaasya.

Omukoro gw’okusimbura emotoka ezitwire amabaati aga gubaire gukuriirwe enganzi y’eihanga, Robinah Nabbanja kandi guhikirweho n’abandi bantu bakuru omu gavumenti abaagambirweho okuryangatanisa amabaati ga Karamoja.

Enganzi y'eihanga, Robinah Nabbanja n'abandi bakuru abahikire aha mukoro gw'okusimbura emotoka z'okutwara amabaati ga Karamoja.

Omuri aba harimu Minisita w’enshonga za Karamoja, Goretti Kitutu, Minisita w’eihanga ow’enshonga za Karamoja, Agnes Nandutu hamwe na Minisita w’eihanga ow’eby’esente Amos Lugolobi, abu kooti erikurwanisa obushomankuzi yaateireho omushango gw’okugambwa kuba babuzabwize amabaati agabaire gari ag’okuheebwa abantu b’omu kyanga ekya Karamoja.

Enganzi y'eihanga, Robinah Nabbanja n'abandi barikurambura sitoowa y'amabaati g'omu ofiisi y'enganzi erikushangwa Namanve omu disiturikiti eya Wakiso.

Arikugambira aha mukoro ogu ogubaire aha sitoowa za ofiisi y’enganzi y’eihanga omuri Namanve omu disiturikiti eya Wakiso, Nabbanja agizire ngu omu mwaka gwa 2007, gavumenti ekataho enteebekanisa y’okuhwera abantu kureeba batuura embeera nungi.

#WestUpdates