Oteirwe amasasi omuri Oyam afiire, orikuteekateekwaho akwatsirwe.

N’ebya Hudson Apunyo

OYAM

Omushaija orikuteekateekwa kuba ateire amasasi omu tauni kanso ya Loro omu disiturikiti eya Oyam aharwakabiri omumwabazyo okufeeriiremu omuntu omwe, akwateirwe omu rurembo orwa Lira.

Nyakuteekateekwaho amanyirwe nka; Pvte. Julius Ecee, omuserukare orikukora n’ekitongore ekya Special Forces Command ah’eishomero erya Kaweweta Uganda Special Forces School omu disiturikiti eya Nakaseke.

Amakuru nigoreka ngu Isaac Okola Kizito,19, omwe aha bantu 3 abahutiire, abaire ariyo naatunga okuragurirwa ah’eirwariro erya St. John XXIII Hospital Aber kandi afiire omu kasheeshe k’orwakana.

Okola n’ow’oruganda rwaba Abwor orurikwebemberwa Col. Rtd. Tony Otoa kandi omutuura w’ekyaro ekya Olangit ‘A’ omu gomborora eya Ogwete omu disiturikiti eya Otuke.

Omushaija omwe obaire aine embundu ajwire ebijwaro by’amahe aharwakabiri ataahiriire tauni kanso ya Loro arikwenda kwiba omuduuka ya Hardware. Beitu hoona, abaasize kwiba shiringi 67,000 ezibaire ziri aha kaunta bwanyima y’omukozi w’omuduuka kuhunga.

Omu kwerarikirira, omushaija ogu atandiikire kuteera amasasi nikwo kuhutaaza abantu bashatu ababaire besherekire omu kyoma ky’okusa ebicoori.

Abandi bantu 2 abatungire obuhuta barimu; Innocent Obwol, 25, omuvugi wa boda hamwe na Emmanuel Okello, 25, omuserukare ori omu kahuumuro kandi bakiriyo nibaragurirwa.

Ceeyamaani wa tauni kanso ya Loro, Robert Ekwaro naagira ngu nyakuteekateekwaho naagambwa kuba akwatsire embundu erimu amasasi 90 akasiga yaginaga omu maka ga ceeyamaani w’entebe y’okubanza omu kyaro kye.

Omugambirizi wa Pooriisi ahabw’ekyanga ekya North Kyoga, Patrick Jimmy Okema ahamiize okukwatwa kwa Pvte. Julius Ecee orikuteekateekwaho arikwongyeraho ngu okucondooza kuriyo nikugyenda omu maisho.

#WestUpdates